Andijonda xizmat vazifasidan foydalanib bankomatlardan 345,5 million so‘mni o‘zlashtirgan bank mutaxassisiga nisbatan jinoyat ishi qo‘zg‘atildi. Bu haqda Bosh prokuratura “Daryo”ga ma’lum qildi.
Ma’lum qilinishicha, Bosh prokuratura huzuridagi Departamentning Jalaquduq tuman bo‘limi tomonidan AT “Xalq banki” tuman filialining murojaatiga asosan tergovga qadar tekshiruv o‘tkazilgan.
Aniqlanishicha, bankning bosh mutaxassisi Z.I. 2020-yilning dekabr va 2021-yilning yanvar oyida tuman dehqon bozoriga o‘rnatilgan bankomatlardan jami 345,5 million so‘m naqd pulni olishga erishib, ushbu pullarni shaxsiy ehtiyojlariga sarflagan holda o‘zining ixtiyorida bo‘lgan juda ko‘p miqdordagi mulkni o‘zlashtirish yo‘li bilan talon-toroj qilgan.
Mazkur holat yuzasidan Z.I.ga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi jinoyat ishi qo‘zg‘atilib, tergov harakatlari o‘tkazilmoqda.
Avvalroq Jizzaxda bankomatdagi pullarni o‘g‘irlamoqchi bo‘lgan yigit qo‘lga olingani to‘g‘risida xabar berilgandi.
Mavzuga doir: O‘zbekistonda bankomatlar soni 10 mingtadan oshdi
Izoh (0)