Ushbu shirinlik faqatgina mohir qandolatchilar tomonidan pishiriladi, deb o‘ylaganlar adashadi. Uni har bir bekajon uy sharoitida ham tayyorlay olishi mumkin.
Foto: “hellomagazine.com”
Kerakli mahsulotlar:
Xamir uchun:
- Suv – 230 ml;
- Un – 1 stakan;
- Shakar – 1 osh qoshiq;
- Sariyog‘ – 100 gramm;
- Tuxum – 4 dona:
- Tuz.
Shokoladli glazur uchun:
- Qora shokolad – 180 gramm;
- Quyuq qaymoq – 1, ½ stakan;
- Apelsin po‘sti.
Krem uchun:
- Sut – 500 ml;
- Tuxum – 2 dona;
- Vanilin – 1 choy qoshiq;
- Shakar – 110 gramm;
- Kraxmal – 55 gramm;
- Yog‘li qaymoq – 200 ml.
Tayyorlanish jarayoni
- Avval shirinlikning xamiri tayyorlanadi. Buning uchun sariyog‘ hamda shakar birgalikda chuqur idishda qaynaguncha eritib olinadi.
- Olov pasaytirilib, un qo‘shiladi, suyuqlik silliq bo‘lguncha yaxshilab aralashtiriladi. 2-3 daqiqadan so‘ng olov o‘chiriladi va bir necha daqiqaga sovutishga qo‘yiladi. So‘ngra 4 dona tuxum birma-bir qo‘shilib, yaxshilab aralashtiriladi.
- Pech qolipi yog‘lanib, qandolat qopchasi yordamida aralashma qolip yuzasiga quyiladi. 190 daraja pechda 30-40 daqiqa davomida pishirib olinadi. Dastlabki 15 daqiqadan so‘ng bug‘ni chiqarish uchun pech eshigiga qoshiqcha tiqiladi. Bu vaqtda pechni ochib bo‘lmaydi, aks holda shirinliklar qiyshayib ketishi mumkin. Ular kerakli tusga kirgunga qadar pishirishda davom etiladi. Tayyor bo‘lganidan so‘ng sovutishga qo‘yiladi.
- Navbat krem tayyorlashga: sut idishga quyiladi, ustidan shakarning yarmi va vanilin solinadi. O‘rtacha olovda qaynatib olinadi.
- 4 ta tuxum chaqilib, qolgan shakar va kraxmal bilan yaxshilab aralashtiriladi.
- Sut qaynayotgan vaqtda uning yarmi alohida idishga olinadi. So‘ngra tuxumli aralashma solinib, yaxshilab aralashtiriladi. Hosil bo‘lgan sutli massa yana avvalgi idishga quyiladi. 2 daqiqa mobaynida massa silliq holga kelguncha aralashtiriladi.
- Tayyor bo‘lgan qandolat kremi alohida idishga olinib, sovutishga qo‘yiladi.
- Qaymoq biroz quyiltirib olingach, oz-ozdan qandolat kremi bilan aralashtiriladi. Qandolat qopchasi yordamida profitrollar orasiga hosil bo‘lgan krem bilan bezak beriladi.
- Glazur uchun qaymoq va shokolad eritiladi. Qaynash holatiga kelganida, yaxshilab aralashtiriladi. So‘ngra olov o‘chirilib, apelsin po‘sti qo‘shiladi.
- Profitrollar ustiga shakar upasi sepilib, ustidan glazur quyiladi va bodom yoki malina bilan bezak beriladi.
Yoqimli ishtaha!
