Katta futbolga qadam qo‘ygan istalgan bolakay borki, mamlakati terma jamoasi safida mundialda o‘ynashdan tashqari, klublar o‘rtasidagi eng nufuzli musobaqa — Chempionlar Ligasida to‘p tepishni ham orzu qiladi. Biroq ulardan sanoqlilarigagina u yerda o‘ynash va g‘olib bo‘lish nasib etadi. Bundaylar sirasiga odatdagidek yana Krishtianu Ronaldu (5 marta) va Lionel Messini (4 marta) kiritish mumkin. Ammo hozir yuqorida nomlari keltirilgan omadli o‘yinchilar haqida emas, balki ushbu turnir bosh sovrinini boshi uzra baland ko‘tarish nasib etmagan taniqli futbolchilar haqida fikr yuritamiz.

Diyego Maradona (“Barselona”, “Napoli”)

Foto: Twitter

“Tilla bola” laqabini olgan marhum Diyego Maradona o‘tgan asrning eng yaxshi futbolchisi sifatida tan olinadi. Biroq unga Yevropa Chempionlari Kubogi/Chempionlar Ligasida g‘alaba qozonish nasib etmagan. “Napoli”da ham “Barselona”da ham musobaqa g‘olibligini qo‘lga kiritish uchun aytarli imkoniyatga ega bo‘lmasa-da, Maradona faoliyatining asosiy qismini Yevropada o‘tkazgan, shunday ekan uni ushbu ro‘yxatga kiritish mantiqan to‘g‘ri bo‘ladi.

Rud van Nistelroy (PSV, “Manchester Yunayted”, “Real”)

Foto: APL

Niderlandiya terma jamoasining sobiq futbolchisi o‘z vaqtida Angliya, Ispaniya va o‘z mamlakati chempionatlarining eng yaxshi to‘purari bo‘lgan. Ammo unga ham “shalpangquloq”ni boshi uzra baland ko‘tarish nasib etmagan. Garchi Nistelroy Chempionlar Ligasidagi gollari soni bo‘yicha eng yaxshilar qatoriga kirsa ham aynan so‘nggi daqiqalarda omad undan yuz o‘giravergan.

Pavel Nedved (“Latsio”, “Yuventus”)

Foto: Sky Sports

Chexiyalik “Oltin to‘p” sohibi bir paytlar dunyoning eng yaxshi yarim himoyachilari qatorida tilga olinardi. “Yuventus” afsonasi 2003-yilda musobaqa sovriniga juda yaqin keladi. Biroq futbolchi yarim final bahsida sariq kartochka olib, hal qiluvchi bahsda jamoasiga (“Yuventus”) yordam bera olmaydi. Kim bilsin, balki o‘shanda Nedved maydonga tushganida “Milan” taslim etilarmidi...

Ronaldo (“Real”, “Barselona”, “Milan” va “Inter”)

Foto: Twitter

Ushbu ro‘yxatning eng yorqin vakili, ikki karra “Oltin to‘p” sohibi Ronaldoning Yevropa Chempionlar Ligasida biror marta ham g‘alaba qozona olmagani ko‘pchilikni ajablantirishi bor gap. Boisi Ronaldo faoliyati davomida “Real”, “Barselona”, “Milan” va “Inter” kabi top-klublarda to‘p surgan. Ko‘rinib turibdiki, futbolda mahorat va tajribadan tashqari omad ham yaxshigina rol o‘ynaydi.

Zlatan Ibragimovich (“Ayaks”, “Yuventus”, “Inter”, “Barselona”, “Milan”, PSJ, “Manchester Yunayted”)

Foto: Twitter

Top jamoalarda o‘ynash borasida Ronaldodan aslo qolishmaydigan shvetsiyalik Zlatan hozircha fantastik karyerasini yakunlaganicha yo‘q. Ehtimol, 2020/21-yilgi birinchilik u uchun oxirgi yevromavsum bo‘lar. Ibraning Chempionlar Ligasidagi faoliyati haqida gap ketganda uning aqlbovar qilmas darajadagi omadsizligini eslamaslik imkonsiz. Gap shundaki, u “Inter” va “Barselona”ni tark etgach, har ikkala klub ham darhol Chempionlar Ligasida g‘olib chiqadi.

Janluiji Buffon (“Yuventus” PSJ)

Foto: Google Images

Dunyoning eng yaxshi darvozabonlaridan biri Buffonga ham Chempionlar Ligasi bosh sovrinini qo‘lga kiritish hamon armonligicha qolmoqda. Faoliyati davomida u mazkur musobaqada uch marotaba finalga qadar yetib borgan, ammo ularning barchasi muvaffaqiyatsizlik bilan tugagan. Katta ehtimol bilan 2020/21-yilgi mavsum Buffon uchun ham oxirgi imkoniyat bo‘ladi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!