Xiaomi yosh Realme’ni tezda “o‘z joyiga o‘tirg‘izib qo‘ydi”. Xitoy giganti raqibining rekordini yangilagan

Xiaomi kompaniyasi Hindistondagi bayram savdolarida 13 milliondan ortiq qurilma, xususan, 9 million smartfon sotganini rasman ma’lum qildi, deb xabar beradi IXBT.

Avvalroq Realme ushbu davr oralig‘ida 8,3 million mahsulot, jumladan, 6,3 million smartfon sotib rekord o‘rnatganini ma’lum qilgandi. Tahlilchilarning ta’kidlashicha, aynan Realme Xiaomi Samsung va Vivo’dan ko‘ra ko‘proq xavf tug‘diradi, chunki oydan oyda Realme savdolari sezilarli darajada o‘smoqda. Yaqinda Realme 50 million smartfon sotib, yangi marrani bozordagi mavjud kompaniyalardan tezroq zabt etdi.

Xiaomi kompaniyasining esa Xiaomi Mi 10T Pro, Redmi Note 9 Pro Max, Redmi Note 9 Pro, Redmi 9 Prime, Redmi 9 va Redmi 9A modellari ommalashgan. Qolgan 4 million qurilma orasidan “aqlli” televizorlar, “aqlli” uylar uchun qurilma va aksessuarlar o‘rin olgan.

Xususan, 450 ming dona “aqlli” televizor, shuningdek, Mi TV Stick va Mi Box 4K pristavkalari sotilgan. Xiaomi’ning ma’lum qilishicha, 4K-televizorlarga bo‘lgan talab o‘tgan yilgidan yuqori, 50 va 55 dyuymli televizorlar savdosi 50 foizdan ko‘proqqa oshgan. Havoni tozalovchi qurilmalar savdosi esa 100 foizga oshgan, shuningdek, Mi Watch Revolve soatlari hamda “aqlli” kolonkalarga bo‘lgan talab ham ortgan.

Avvalroq “Bo‘ydoqlar kuni” munosabati bilan o‘tkazilgan chegirmalar dunyodagi eng yirik onlayn-savdolardan biriga aylangani to‘g‘risida xabar berilgandi.