Xitoyning Chunsin shahridagi Buyuk Britaniya bosh konsuli Stiven Ellison daryoda cho‘kayotgan talaba qizni qutqardi. Voqea guvohlari olgan video internetning Xitoy segmentida tarqaldi, deb yozmoqda Meduza.
Xabarda aytilishicha, voqea 14-noyabr kuni Chjunshan shahrida mashhur sayyohlik marshrutida sodir bo‘lgan. 24 yoshli qiz ko‘prikdan suvga yiqilib tushgan. Yaqin atrofda buni ko‘rgan ko‘plab odamlar bo‘lgan, lekin hech kim qizning orqsidan sakrashga harakat ham qilmagan. Shunda 61 yoshli Ellison uni qutqarishga qaror qilgan. U hushidan ketgan qizning yoniga suzib borgan, shundan so‘ng odamlar qirg‘oqdan qutqarish halqasini tashlab, ularga suvdan chiqishga yordam bergan.
Xitoy Tashqi ishlar vazirligining rasmiy vakili Chjao Liszyan Ellisonning harakatini “qahramonlik” deb atagan. O‘z navbatida Xitoyning Buyuk Britaniyadagi elchisi Li Syaomin “Ushbu qahramonlik va mehribonlik harakati unutilmaydi va Xitoy–Britaniya do‘stligi tarixiga yoziladi”, — deb aytgan.
The Guardian’ning qayd etib o‘tishicha, Buyuk Britaniya va Pekin o‘rtasidagi diplomatik munosabatlar ayni paytda juda keskin. Bu so‘nggi yilda Pekindan Gonkongga bosim kuchayishi, shuningdek, Huawei’ga Buyuk Britaniyada 5G tarmoqlarini joylashtirishda ishtirok etish mamlakat hukumati tomonidan taqiqlangani bilan bog‘liq.
Xitoy ijtimoiy tarmoqlarida izoh yozgan aksariyat foydalanuvchilar Ellisonni qahramon deb atadi, ammo ko‘pchilik chet ellikdan boshqa hech kim qizni qutqarmaganiga jahli chiqqanini ham bildirgan.
The New York Times’ning yozishicha, Xitoyda ko‘pchilik odamlar yordam berishdan qo‘rqadi. Chunki keyinchalik jabrlangan odamga zarar yetkazishda ayblanib, davolanish uchun xarajatga tushishlari mumkin. Bunday holatlar mamlakatda so‘nggi yillarda bir necha marta kuzatilgan.
Shuningdek, nashrning qayd etishicha, aksariyat xitoyliklar suzishni bilmaydi — mamlakatda yil davomida 60 mingga yaqin kishi cho‘kib o‘ladi. Bunday o‘lim Xitoyda 14 yoshgacha bo‘lgan bolalar orasidagi o‘limlarning eng keng tarqalgan sabablaridan biridir.
Izoh (0)