Sirdaryo viloyati Oqoltin tumanida Nexia avtomobili MAN yuk mashinasining ortidan urilishi oqibatida ag‘darildi va yonib ketdi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, 2020-yilning 6-oktabr kuni soat 01:20 da Sirdaryo viloyati Oqoltin tumani hududidan o‘tuvchi M-39 avtomobil yo‘lining 924-kilometrida yo‘l-transport hodisasi sodir bo‘lgan.
Termiz—Toshkent yo‘nalishida ketayotgan 1994-yilda tug‘ilgan haydovchi, Surxondaryo viloyati Qumqo‘rg‘on tumanida yashovchi E.T. Nexia avtomobilini boshqarib borayotib, o‘zidan oldinda, shu yo‘nalishda harakatlanib ketayotgan “Koson maxsus mexanizatsiyalashgan” MChJga tegishli, fuqaro T.Sh. boshqaruvida bo‘lgan MAN rusumli yuk avtomashinasi tirkamasining orqasiga urilgan. Natijada Nexia haydovchisi rul boshqaruvini yo‘qotib, yo‘lning o‘ng tomoniga ag‘darilgan va yong‘in yuzaga kelgan.
YTH natijasida Nexia avtomobilida bo‘lgan yo‘lovchi va Surxondaryo viloyati Qumqo‘rg‘on tumanida yashovchi 1996-yilda tug‘ilgan E.Sh. tan jarohatlari olib, shifoxonaga yotqizilgan.
Holat yuzasidan Oqoltin tumani IIB huzuridagi Tergov bo‘limi tomonidan surishtiruv harakatlari olib borilmoqda.
Izoh (0)