Toshkent shahri Yunusobod tumanida bir guruh shaxslar o‘zaro janjallashishi oqibatida 2 kishi vafot etdi, deya xabar bermoqda Bosh prokuratura.
Qayd etilishicha, 2020-yil 20-sentabr kuni soat 06:00 larda Yunusobod tumani, Amir Temur ko‘chasida joylashgan tungi klubdan chiqqan shaxslar ko‘chada turgan boshqa bir guruh shaxslar bilan o‘zaro janjallashgan.
Janjal vaqtida fuqaro S.X. yonida bo‘lgan pichoq bilan 4 nafar shaxsga bir necha marotaba tan jarohatlari yetkazib, hodisa joyidan yashiringan.
Oqibatda 2 nafar shaxs vafot etgan, qolgan 2 nafarining hayoti saqlab qolingan.
Mazkur holat yuzasidan shu kuni Toshkent shahar prokuraturasi tomonidan S.X.ga nisbatan Jinoyat kodeksining 97-moddasi 2-qismi “a”, “l” bandlari (bezorilik oqibatida ikki yoki undan ortiq shaxsni o‘ldirish), 25,97-moddasi 2-qismi “a”, “l” bandlari bilan jinoyat ishi qo‘zg‘atilgan.
S.X. protsessual tartibda ushlangan. Hozirda holat yuzasidan tergov harakatlari olib borilmoqda.
Izoh (0)