Qozog‘istonda koronavirus va pnevmoniya qurbonlari soni 1671 kishiga, Qirg‘izistonda esa 1063 nafarga yetdi

Qozog‘istonda o‘tgan bir sutka ichida yana 65 kishida koronavirus aniqlandi. Bu haqda mamlakat Sog‘liqni saqlash vazirligiga tayanib, Tengrinews xabar berdi.

Butun mamlakat bo‘ylab COVID-19 bilan kasallanganlar soni 107 199 kishiga yetdi. Koronavirusga chalinish bo‘yicha yangi holatlar quyidagi hududlarda aniqlangan:

• Olmaota shahri — 14 344 (+8);
• Nur-Sulton shahri — 13 991 (+4);
• Atirau viloyati — 11 038 (+5);
• Qarag‘anda viloyati — 10 218 (+4);
• Sharqiy Qozog‘iston viloyati — 8505 (+22);
• G‘arbiy Qozog‘iston viloyati — 6836 (+3);
• Chimkent shahri — 5184 (+1);
• Olmaota viloyati — 4947 (+1);
• Jambil viloyati — 4115 (+3);
• Shimoliy Qozog‘iston — 4043 (+4);
• Pavlodar viloyati — 3887 (+1);
• Kostanay viloyati — 3461 (+3);
• Aqmo‘la viloyati — 3456 (+2);
• Turkiston viloyati — 3364 (+1);
• Mang‘istov viloyati — 3337;
• Qizilo‘rda viloyati — 3237 (+1);
• Aqto‘be viloyati — 3236 (+2).

Mamlakatda hozirga qadar bemorlarning 101 822 nafari sog‘aygan bo‘lsa, 1671 kishi koronavirus va pnevmoniya asoratlari oqibatida vafot etgan (o‘tgan bir sutkada — 5 kishi).Qirg‘izistonda 19-sentabr holatiga ko‘ra, koronavirus bilan kasallanish bo‘yicha yana 91 ta holat aniqlandi. Bu haqda mamlakat Sog‘liqni saqlash vazirligiga tayanib, Kloop xabar berdi.

Koronavirusga chalinish bo‘yicha yangi holatlar quyidagi hududlarda aniqlangan:

• Botken viloyati — 30;
• Bishkek — 9;
• Jalolobod — 12;
• O‘sh viloyati — 17;
• Issiqko‘l viloyati — 15;
• Chuy viloyati — 6;
• Norin viloyati — 1;
• Talas viloyati — 1;

Mamlakatda pandemiya boshlanganidan buyon COVID-19 aniqlanganlar soni 45 335 kishini tashkil etmoqda. O‘tgan bir sutka ichida 69 bemor sog‘aygan.

Qirg‘izistonda hozirga qadar koronavirus infeksiyasi oqibatida vafot etganlar soni 1063 kishiligicha qolmoqda. O‘tgan bir hafta ichida ushbu ko‘rsatkich o‘zgarmagan. Statistikaga kiritilgan bu kabi o‘zgartirish SSV tomonidan amalga oshirilgan bo‘lib, yondosh kasallikka ega, xususan, yurak kasalligi bor 400 ta holat olib tashlangan. Shu bilan birga, vazirlik statistikani JSST metodikasi bo‘yicha qayta hisoblashga va’da bergan.

Afg‘onistonda o‘tgan bir sutka ichida yana 22 kishida koronavirus infeksiyasi aniqlandi. Bu haqda mamlakat Sog‘liqni saqlash vazirligiga tayanib, Tolo News xabar berdi.

Afg‘onistonda pandemiya boshlanganidan buyon COVID-19 bilan kasallanganlarning umumiy soni 38 919 kishiga yetgan, hozirga qadar 32 576 kishi davolangan, 1437 kishi virus qurboniga aylangan (o‘tgan bir sutkada birorta o‘lim holati qayd etilmagan).

Tojikistonda 18-sentabr holatiga ko‘ra, koronavirus bilan kasallanganlar soni 9259 kishiga yetdi. Bu haqda mamlakat Sog‘liqni saqlash vazirligiga tayanib, Asia Plus xabar berdi.

O‘tgan bir sutka ichida yana 45 kishida COVID-19 aniqlangan. Hozirga qadar virus qurbonlari soni 73 kishiga yetgan, 8026 kishi kasallikdan davolangan.

O‘zbekistonda 19-sentabr soat 10:00 holatiga ko‘ra, koronavirus infeksiyasi qayd etilganlar soni 50 634 nafarga yetdi. Bu haqda Sog‘liqni saqlash vazirligi xabar berdi. Ayni paytda mamlakatda 46 645 nafar koronavirus infeksiyasiga chalingan fuqarolar (92 foiz) sog‘aygan, 3 566 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda.