Toshkent viloyati Chinoz tumani “Ko‘tarma” mahalla fuqarolar yig‘ini hududidan o‘tgan M-39 Toshkent—Termiz yo‘lining 858-kilometrida 13-sentabr kuni soat taxminan 00:10 da Nexia va Lacetti ishtirokida yo‘l-transport hodisasi yuz berdi, deya xabar bermoqda IIV Yo‘l harakati xavfsizligi bosh boshqarmasi matbuot xizmati.
“1986-yilda tug‘ilgan haydovchi T.S. xavfsizlik kamarini taqmay Nexia-3 ni boshqarib ketayotib, boshqaruvni yo‘qotib, yo‘lni ikkiga ajratuvchi beton to‘siqdan yo‘lning qarama-qarshi tomoniga o‘tib ketib, qarshisidan kelayotgan haydovchi, 1981-yilda tug‘ilgan, xavfsizlik kamarini taqmagan F.N.ning Lacetti’si bilan to‘qnashgan”, — deyiladi xabarda.
Hodisa oqibatida Nexia-3 ning 34 yoshli haydovchisi T.S., Lacetti’ning 39 yoshli haydovchisi F.N., Lacetti’da bo‘lgan ikki yo‘lovchi — 40 yoshli E.X. erkak va shaxsi hozircha aniqlanmagan 25-30 yoshlardagi ayol og‘ir tan jarohatlari olib voqea joyida vafot etgan. Lacetti’ning yana ikki yo‘lovchisi — 29 yoshli K.B. va 44 yoshli Yu.H. tan jarohati olib, shifoxonaga yotqizilgan.
YTH yuzasidan Chinoz tumani IIB huzuridagi Tergov bo‘limi tomonidan Jinoyat kodeksining 266-moddasi 3-qismi “a” bandi (odamlar o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, hozirda tergov harakatlari olib borilmoqda.
Mavzuga doir:
- Surxondaryodagi YTHda 6 kishi halok bo‘ldi. Qurbonlarning eng kichigi 2 oylik chaqaloq
- Namanganda yuz bergan YTHda to‘rt kishi halok bo‘ldi
- Chiroqchida Nexia va Howo yuk mashinasi ishtirokida sodir bo‘lgan YTH oqibatida 3 kishi halok bo‘ldi. Ular orasida 1 yoshli bola ham bor
- Qashqadaryoda yuk mashinasi va Nexia to‘qnashishi natijasida 6 yashar qizaloq halok bo‘ldi
- O‘zbekistonda sakkiz oyda oqibati o‘lim bilan tugagan salkam 1000 ta YTH yuz berdi
Izoh (0)