Amerikalik afsonaviy basketbolchi Maykl Jordanga tegishli bo‘lgan Mercedes-Benz S600 eBay onlayn auksion orqali sotildi. O‘zining kimligini oshkor qilmagan xaridor Lorinser tyuning-atelyesi tomonidan ta’mirlangan kupe uchun 202,2 ming dollar to‘lagan. Taqqoslash uchun bu pulga yangi Porsche 911 Turbo S beradi, deb xabar qiladi Motor.
Green Black Metallic rangli avtomobilning boshlang‘ich stavkasi 23 dollarni tashkil etgan. Savdolar davomida 177 ta ariza kelib tushgan bo‘lib, bu mashina narxini qariyb 9 ming barobarga ko‘tarib yuborgan.
Avtomobilga 18 dyuymli xromlangan g‘ildirak diskalari va ikkitalik Lorinser gaz chiqargichi, elektr uzatmali lyuk, tormoz diskalari va avtomatik transmissiya o‘rnatilgan. 1996-yilgi nusxalar o‘rindiqlarni isitish, konditsioner, kruiz-nazorat, xavfsizlik yostiqchasi va og‘ish burchagiga qarab moslanuvchi rul bilan jihozlangan.
S600 modeli 389 ot kuchiga ega 6,0 litrli V12 yordamida harakatga keladi. 24 yoshli mashina odometriga ko‘ra, u 252,6 ming kilometr yo‘l bosgan.
Avtomobil bilan birga xaridor mashinaga dastlab Maykl Jordan va uning sobiq turmush o‘rtog‘i Xuanita Vanoy egalik qilganini ko‘rsatuvchi hujjatlarga ham ega bo‘lgan. Bundan tashqari, Mercedes’ga telefon o‘rnatilgan bo‘lib, undan foydalanilganida qurilma panelida NBA afsonasining ismi paydo bo‘ladi.
Avvalroq AQShda Elton Jonga tegishli bo‘lgan noyob Delahaye 175 kabrioleti, rok-musiqachi Erik Kleptonning Ferrari 599 GTB avtomobili sotuvga qo‘yilgani to‘g‘risida xabar berilgandi.
Izoh (0)