Senat raisi Tanzila Norboyeva boshchiligida videokonferensiya tizimi orqali 13-iyulda o‘tkazilgan Senat kengashining majlisida erta turmush va erta tug‘ruq holatlari hamda oilaviy ajralishlar bilan bog‘liq muammolarni bartaraf etish chora-tadbirlari to‘g‘risidagi masalalar ko‘rib chiqilgan. Bu haqda Senat axborot xizmati xabar qilgan.
“So‘nggi yillarda 18 yoshga to‘lmagan qizlar orasida erta tug‘ruq holatlari ham kamayib, 2018-yilda bunday salbiy holatlar 1,5 mingdan ziyod bo‘lgan, 2019-yilda esa bu ko‘rsatkich 1,2 mingtani tashkil etgan. 2020-yilning birinchi choragida 231 ta erta tug‘ruq holatlari qayd etilgan.
Olib borilayotgan ishlarga qaramay, bu borada qator muammolar mavjudligiga urg‘u berildi. Tahlillarga ko‘ra, ushbu muammoga, avvalo, aholining huquqiy savodxonligi va tibbiy madaniyatining yetarli emasligi sabab bo‘lmoqda.Bundan tashqari, voyaga yetmagan qizlar, ayniqsa 13-14 yoshli qizlar orasida erta tug‘ruq holatlarining ko‘payib borayotgani tashvishli holdir”, – deyiladi parlament yuqori palatasi axborot xizmatining xabarida.
Yig‘ilishda erta homiladorlik va tug‘ruq holatlari kuzatilgan o‘quvchi qizlarning qariyb yarmi ota yoki onasiz oilalarda yashayotganligi, oiladagi yetishmovchilik, ota-onalarning ishsizligi yoki kam daromad topishi ham qizlar tarbiyasiga salbiy ta’sir qilayotgani ta’kidlangan.
Erta va istalmagan tug‘ruq holatlari, yoshlarning oilaviy munosabatlarga tayyor emasligi, oiladagi ijtimoiy-ma’naviy beqarorlik kabi sabablar chaqaloqlar savdosi jinoyatini ham keltirib chiqarayotgani aytilgan. Bu kabi muammolarni bartaraf etish maqsadida Senat Kengashi qarori bilan erta turmush va erta tug‘ruq holatlari hamda oilaviy ajralishlar bilan bog‘liq muammolarni bartaraf etish bo‘yicha 2020–2021-yillarga mo‘ljallangan kompleks chora-tadbirlar dasturi tasdiqlangan.
Majlisda ko‘rib chiqilgan masalalar yuzasidan Oliy Majlis Senati Kengashining tegishli qarorlari qabul qilingan.
Izoh (0)