Namangan shahrida viloyat IIB Migratsiya va fuqarolikni rasmiylashtirish boshqarmasida ishlovchi tanishlari orqali pul evaziga pasport to‘g‘rilab berishni va’da qilgan shaxs ushlandi. Bu haqda DXX matbuot xizmati “Daryo”ga ma’lum qildi.
Ma’lumotlarga ko‘ra, DXX Namangan viloyati boshqarmasi hamda Bosh prokuratura huzuridagi departament xodimlari bilan hamkorlikda tezkor tadbir o‘tkazilgan. Unda Namangan shahrida yashovchi Turkiya fuqarosi go‘yoki viloyat IIB Migratsiya va fuqarolikni rasmiylashtirish boshqarmasida ishlovchi tanishlari orqali biometrik va xorijga chiqish pasportini rasmiylashtirib berishni va’da qilgan. Ushbu xizmati evaziga u mahalliy fuqarodan firibgarlik yo‘li bilan 200 AQSh dollari va 2 million so‘m pul mablag‘ini olgan vaqtida ashyoviy dalillar bilan ushlangan.
Aniqlanishicha, mazkur shaxs Turkiyadan deportatsiya bo‘lgan bir nechta fuqarolarning ushbu davlatga kirish huquqlarini tiklab berishni va’da qilib, muqaddam ulardan chet el valyutasida pul mablag‘lari ham olgan.
Hozirda aniqlangan holat yuzasidan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari olib borilmoqda.
Mavzuga doir:
Izoh (0)