O‘zbekistonda karantinga olingan ko‘p qavatli uylarda necha marta dezinfeksiya amalga oshirilishi ma’lum qilindi
O‘zbekiston Sanitariya-epidemiologiya nazorati davlat inspeksiyasi bosh inspektori Nurmat Otabekov 3-iyun, chorshanba kuni bo‘lib o‘tgan brifingda karantinga olingan ko‘p qavatli uylarda necha marta dezinfeksiya ishlari amalga oshirilishi haqida ma’lumot berdi.
Uning ma’lum qilishicha, ko‘p qavatli uylarda zinapoya, tambur, lift, kirish joyi, chiqindi tashlash joylarida joriy va yakuniy dezinfeksiya ishlari amalga oshiriladi.
Joriy dezinfeksiya ishlari ko‘p qavatli uyda yashovchi aholini ogohlantirgan holda kuniga ikki marta — ertalab va kechqurun o‘tkaziladi.
Shuningdek, Nurmat Otabekov karantindan chiqqan fuqaro bilan qo‘l berib ko‘rishish masalasiga ham to‘xtaldi.
Uning ta’kidlashicha, nafaqat karantin zonadan kelganlar bilan, balki boshqa insonlar bilan ham qo‘l berib, quchoqlashib, bosh urishtirib va o‘pishib ko‘rishish mumkin emas.
Avvalroq O‘zbekistonda bir kunda 2600 dan ortiq fuqaro karantinga olingani, Buxoroda koronavirusga chalingan oila bilan muloqot qilgan 268 fuqaro, koronavirusga chalingan 2 nafar andijonlik haydovchi sababli esa qariyb 100 kishi karantinga olingani haqida xabarlar berilgandi.
