Argentinalik hujumchisi Mauro Ikardi PSJ jamoasida qoladigan bo‘ldi. Bu haqda parijliklar rasmiy sayti ma’lum qildi.
Tomonlar 2024-yilning 30-iyuniga qadar amal qiladigan shartnoma imzolagan.
Xabarlarga ko‘ra, PSJ Ikardi transferi uchun “Inter”ga 50 million yevro to‘laydi. Shuningdek, 8 million yevro miqdorida bonus pullari ham nazarda tutilgan. Futbolchining o‘zi Parij klubida yiliga bonuslardan tashqari 8 million yevro maosh oladi.
PSJ Ikardini 2019-yilning yozida “Inter”dan sotib olish huquqi bilan ijaraga olgandi. Joriy mavsum Mauro PSJ safida 31 o‘yin o‘tkazib, 20 gol va to‘rtta samarali uzatma muallifiga aylandi.
Argentinalik yulduz 2013-yildan buyon “Inter”da to‘p surib kelardi. U milanliklar safida 188 o‘yinda qatnashib, ularda 111 gol urgan. 2019-yilning yozida “Inter” boshqaruviga kelgan Antonio Konte Ikardi bilan birga ishlash niyati yo‘qligini bildirgan va hujumchi PSJ safiga kelib qo‘shilgandi.
Koronavirus pandemiyasi sabab Fransiya chempionatining joriy mavsumi muddatidan avval yakunlandi va unda PSJ chempionlikni qo‘lga kiritdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)