“Navoiy” erkin iqtisodiy zonasida Eron bilan hamkorlikda Navoiy Motors qo‘shma korxonasi faoliyati yo‘lga qo‘yilmoqda. Qiymati 12 million dollarga teng ushbu loyiha, O‘zAning qayd etishicha, O‘zbekiston “avtomobilsozlik sanoatida tub burilish yasashi kutilmoqda”.

Korxona bosh texnologi Afshin Shokiriyning so‘zlariga ko‘ra, bu yerda Xitoyning Oshan brendi ostida dastlab ichki bozor yo‘ltanlamas, pikap, miniven kabi kuzovli avtomobillar yig‘ish yo‘lga qo‘yiladi. Korxona yiliga 30 ming dona avtomobil ishlab chiqarish quvvatiga ega bo‘ladi.

Afshin Shokiriyning qayd etishicha, avtozavod 2020-yil oxirigacha ishga tushishi rejalashtirilgan. Hozirda korxona qurilishi doirasida sement, o‘lchov, tuproq ishlari olib borilayapti, ish karantin talablari asosida tashkil etilgan.

Oshan qanday brend?

Internet Xitoy Oshan avtomobil brendi bo‘yicha so‘rov berilsa, faqat Changan avtomobilsozlik kompaniyasining Oushan (Ossan) va Oushang brendi ostidagi avtomobillari chiqib keladi. Har ikkala brend ostida yo‘ltanlamas va minivenlar bor.

Jumladan, Oushan brendi ostida COS1°, COS1° GT, X7 yo‘ltanlamaslari, Cosmos miniveni ishlab chiqariladi.

Oushan COS1°.

Foto: Wikipedia

Oushan Cosmos.

Foto: Wikipedia

Oushan X7.

Foto: Wikipedia

Oushan COS1° GT.

Foto: Wikipedia

Oushang brendi ostida esa X70A, CX70 yo‘ltanlamaslari, A600, A800 minivenlari ishlab chiqarilgan.

Oushang X70A.

Foto: Wikipedia

Oushang A600.

Foto: Wikipedia

Oushang A800.

Foto: Wikipedia

Oushang CX70 GT.

Foto: Wikipedia

Oushang CX70.

Foto: Wikipedia

O‘zbekistonda ushbu modellarning aynan qay biri ishlab chiqarilishi ko‘zda tutilgani noma’lum.

O‘zbekistonda ishga tushishi aytilgan boshqa avtozavodlar

So‘nggi to‘rt yilda O‘zbekistonda avtozavod qurish istagini bildirgan kompaniyalar soni ko‘pchilikni tashkil etadi. Xususan, Changan kompaniyasi bilan bog‘liq xabarlar bir necha paydo bo‘lgan. 2018-yil iyunida kompaniya vakillari Farg‘ona vodiysida elektromobillar yig‘ishni yo‘lga qo‘ymoqchi ekani, 2019-yil mayida esa Jizzax viloyatida avtozavod qurish masalasida viloyat hokimligi bilan muzokaralar o‘tkazgani haqida xabarlar tarqalgan edi.

“Jizzax” erkin iqtisodiy zonasida esa 2019-yildan Peugeot Expert va Peugeot Boxer ishlab chiqarilishi kerak edi, biroq keyinchalik ushbu loyiha to‘xtatilgani, qurib bo‘lingan zavodda Volkswagen kompaniyasi bilan imzolangan kelishuv doirasida 2020-yildan yiliga 20 ming dona Volkswagen Caddy avtomobilini ishlab chiqarishi ma’lum qilindi.

Bundan tashqari, “Qo‘qon” erkin iqtisodiy zonasida 2022-yildan Xitoyning Silk Road Company kompaniyasi bilan hamkorlikda narxi taxminan 3 ming dollar, tashqi ko‘rinishi Mercedes AMG’ni eslatadigan elektromobillar, 2023-yildan esa Hyundai kompaniyasi bilan hamkorlikda Ioniq va Hyundai Kona elektromobil ishlab chiqarilishi boshlanishi kerak.

Hyundai tomonidan vodiyning boshqa viloyati — Namanganda tijorat avtomobillari va avtobuslar ishlab chiqarish bo‘yicha avtozavod qurish loyihasi ham amalga oshirilayotgani, korxona 2020-yil birinchi choragida ilk mahsulotni taqdim etishi aytilgan. Popda esa 2019-yil sentabridan UzFoton brendi ostida mikroavtobuslar chiqishi kerak edi.

2019-yil sentabrida Xitoyning Hebei Good Hope Logistics Development kompaniyasi Angrenda elektromobillar ishlab chiqaruvchi loyihani ishga tushirishi ma’lum bo‘lgandi. Shuningdek, Fiat Chrysler, Henan Suda kompaniyalari ham O‘zbekistonda avtomobil ishlab chiqarishga qiziqish bildirgani haqida xabarlar tarqalgan.