Davlat soliq qo‘mitasi ijtimoiy tarmoqlarda soliq xizmati organlari xodimlari “O‘rikzor” bozorida tadbirkorlardan ishlanmagan kunlar uchun to‘lov hamda Sirdaryo viloyatining Sardoba tumaniga majburiy ravishda xayriya mablag‘lari o‘tkazishni talab qilayotgani to‘g‘risida tarqalgan xabarlarga munosabat bildirdi.
Qo‘mitaning ta’kidlashicha, mamlakatda xayriya amallari ixtiyoriy bo‘lib, muhtojlarga yordam ko‘rsatgan tadbirkorlar bir qator soliq imtiyozlaridan foydalanishi mumkin.
Ma’lumotlarga ko‘ra, xayriya yordami ko‘rsatayotgan tadbirkorlar hamda ularni olayotgan jismoniy shaxslar to‘g‘risidagi ma’lumotlar Davlat xizmatini rivojlantirish agentligining “Saxovat.argos.uz” saytida shakllantirib borilmoqda.
Ushbu saytga joylashtirilgan ma’lumotlar O‘zbekiston Prezidentining 27-apreldagi PF-5986-son farmonida belgilangan soliq imtiyozlarini qo‘llash uchun asos bo‘lib xizmat qiladi.
“Davlat soliq qo‘mitasi tomonidan soliq xizmati organlari xodimlari ‘O‘rikzor’ bozoridagi tadbirkorlarni xayriya mablag‘lari o‘tkazishga majburlayotganligi holati zudlik bilan o‘rganib chiqildi. Ishontirib aytamizki, bu ma’lumotlar haqiqatga to‘g‘ri kelmaydi”, — deyiladi xabarda.
Tadbirkorlar davlat soliq xizmati organlari xodimlari tomonidan xayriya ishlariga majburlash holatlariga duch kelsa, bu haqda Davlat soliq qo‘mitasining 71-244-98-98 raqamli ishonch telefoniga zudlik bilan murojaat qilishlari so‘raladi
Bunday faktlar tasdiqlangan taqdirda DSQ rahbariyati tomonidan davlat soliq xizmati organlari xodimlariga nisbatan qat’iy choralar ko‘rilishi qayd etilgan.
Mavzuga doir:
Izoh (0)