Rossiyada so‘nggi bir sutka ichida 10 559 kishida koronavirus aniqlanib, kasallanganlarning umumiy soni 165 929 nafarga yetdi, deb xabar bermoqda “RBK” Kasallikka qarshi kurash bo‘yicha tezkor shtabga tayanib.
Foto: Reuters
Umumiy hisobda Rossiyada 1 537 kishi vafot etgan, 21 327 nafari sog‘aygan. Mamlakatda qatorasiga 4 kundan beri har sutkada 10 mingdan ortiq kishida koronavirus aniqlanmoqda. 3-may kuni 10 633 ta, 4-may kuni 10 581 ta holat aniqlangan bo‘lsa, 5-may kuni 10 102 kishida koronavirus qayd etilgan.
Qayd etilishicha, yangi kasallanganlarning 40 foizida kasallikning klinik belgilari kuzatilmagan. So‘nggi sutkada qayd etilgan kasallanish holatlarining eng ko‘pi — 5 858 tasi Moskva shahrida aniqlangan. Shuningdek, bemorlarning 312 nafari Moskva viloyatidan, 829 nafari Sankt-Peterburgdandir.
Moskva koronavirusga chalinganlar soni ortishi bo‘yicha ham mamlakatda birinchi o‘rinda — poytaxtda shu kungacha 85 973 kishi koronavirusga chalingani qayd etilgan.
Virusologlar kasallanganlar sonining ortishi uni aniqlash bo‘yicha o‘tkazilayotgan testlar sonining ortgani bilan bog‘liq bo‘lishi mumkin, deb hisoblamoqda. 5-may holatiga ko‘ra, Rossiyada koronavirusni aniqlash bo‘yicha 4,4 millionta test o‘tkazilgan.
