O‘zbekistonda 2020—2021 o‘quv yilidan boshlab oliy ta’lim muassasalarida tasviriy va amaliy san’at hamda dizayn yo‘nalishida ta’lim olayotgan talabalar uchun Kamoliddin Behzod nomidagi davlat stipendiyasi ta’sis etiladi, deb xabar bermoqda “Huquqiy axborot” kanali.
Bu haqda 21-aprel kuni imzolangan “Tasviriy va amaliy san’at sohasi samaradorligini yanada oshirishga doir chora-tadbirlar to‘g‘risida”gi Prezident qarorida qayd etildi.
Qarorga muvofiq, 2020-yil oktabr oyida buyuk musavvir va naqqosh Kamoliddin Behzod tavalludining 565-yilligi keng nishonlanadi. Kamoliddin Behzod xotirasini abadiylashtirish maqsadida Toshkent shahrining ko‘chalaridan biriga uning nomi beriladi.
Shuningdek, “Kamoliddin Behzod izdoshlari” miniatyura va xalq amaliy san’ati asarlari ijodiy tanlovi tashkil etiladi va har yili an’anaviy tarzda o‘tkazib boriladi.
2020-yil 15-sentabrga qadar Kamoliddin Behzod nomidagi Sharq miniatyura san’ati muzeyi xiyoboni zamonaviy qiyofada qayta tashkil etiladi va uning hududidagi Kamoliddin Behzod haykali 2022-yilda bronzaga almashtiriladi.
O‘zbekiston Badiiy akademiyasi huzurida:
- Badiiy ta’lim yo‘nalishlaridagi pedagog va mutaxassis kadrlarni qayta tayyorlash hamda ularning malakasini oshirish markazi;
- oliy o‘quv yurtidan keyingi ta’lim tizimida tayyorgarlik bosqichi sifatida Rassomlik mahorati ustaxonasi (Oliy rassomlik kursi) tashkil etiladi.
2020-yil 1-noyabrdan boshlab O‘zbekiston Badiiy akademiyasi markaziy apparati xodimlarining lavozim maoshiga davlat budjeti mablag‘lari hisobidan 100 foiz miqdorida oylik ustamalar belgilanadi.
Izoh (0)