AQSh Janubiy Koreyaning Eronga gumanitar yordam ko‘rsatishiga ruxsat berdi. Bu haqda Yonhap agentligi xabar qildi.
Ta’kidlanishicha, AQShning litsenziyasini olgach Janubiy Koreya sanksiyalar ostiga tushishdan qo‘rqmay, may oyida Eronga mahsulot yetkazib berishni qayta boshlashi mumkin. Birinchi navbatda, gap dori vositalari va tibbiy buyumlar haqida ketmoqda. Bunda Janubiy Koreya tomoni yetkazib berilgan yuklar belgilangan maqsadlarda foydalanilishini nazorat qilishi kerak bo‘ladi.
Avvalroq AQSh Eronning koronavirusga qarshi kurashda yordam olishiga xalaqit berishi mumkinligi haqida ma’lumot paydo bo‘lgan. AQSh Tehron tomonidan so‘ralgan Xalqaro valyuta jamg‘armasining shoshilinch kreditini to‘xtatib qo‘yishi mumkinligi haqida xabar berilgan. AQSh prezidenti administratsiyasidagi manbalarning ma’lum qilishicha, Eron hukumatining yuqori mansabli amaldorlari bir necha marta ajratilgan gumanitar yordamning bir qismini o‘zida olib qolgan.
So‘nggi ma’lumotlarga ko‘ra, Eronda koronavirusga chalinganlar soni 66 200 kishidan oshgan, 32 ming kishi sog‘aygan, 4100 kishi kasallikdan vafot etgan.
Butun dunyoda koronavirusga chalinganlar soni 1,6 million kishidan oshgan. Kasallikdan vafot etganlar 96 ming kishiga yetgan. Tuzalganlar soni esa 355 ming kishidan ortiqni tashkil etmoqda.
Ma’lumot uchun, AQShda o‘tgan bir sutka ichida 1904 kishi koronavirus oqibatida vafot etdi. Donald Tramp AQShda koronavirus o‘zining eng yuqori cho‘qqisiga chiqqanini ma’lum qildi.
Izoh (0)