Bosh prokuratura xodimlari o‘z maoshlarining yana bir qismini koronavirus infeksiyasiga qarshi kurash doirasida tashkil etilgan “Mehr-shafqat va salomatlik” jamoat fondiga o‘tkazib berdi. Bu haqda Bosh prokuratura matbuot kotibi ma’lum qildi.
Prokuratura xodimlari avval ham o‘z ish haqlarining bir qismini beg‘araz yordam sifatida ushbu fondga ixtiyoriy ravishda o‘tkazib bergandi.
Ayni paytda COVID-19 pandemiyasiga qarshi kurashda fuqarolarni ruhan qo‘llab-quvvatlash maqsadida tashkil etilgan “O‘zbekiston Mehr-shafqat va salomatlik” jamoat fondiga tushayotgan beminnat mablag‘lar miqdori ortib bormoqda.
Bosh prokuratura xodimlaridan tashqari Prezident Administratsiyasi, Davlat xavfsizlik xizmati, IIV, Prokuratura va MIB xodimlari, Oliy Majlis Qonunchilik palatasi deputatlari, senatorlar, O‘zbekiston teleradiokompaniyasi va Xalqaro press-klub ushbu fondga pul mablag‘lari o‘tkazgan. Bundan tashqari, 2 161 nafar fuqaro tomonidan ham fondga 3 milliard so‘m kelib tushgan.
Rossiyada istiqomat qiluvchi va ayni paytda Toshkentdagi uyida o‘z-o‘zini ijtimoiy izolyatsiya qilayotgan o‘zbek milliarderi Alisher Usmonov ushbu fondga 20 million dollar mablag‘ o‘tkazib berdi.
O‘zbekistonlik bir guruh taniqli san’atkorlar ham koronavirus epidemiyasiga qarshi kurashish uchun 350 million so‘mdan ko‘proq mablag‘ ajratdi.
Eslatib o‘tamiz, yakka tartibdagi xayriya aksiyalari davomida koronavirusning tarqalish xavfi juda yuqori hisoblangani uchun Respublika maxsus komissiyasi qaroriga muvofiq, yakka tartibdagi xayriya aksiyalari 2020-yilning 1-aprelidan e’tiboran vaqtincha to‘xtatildi.
Izoh (0)