O‘gay singlisidan so‘ng Kim Kardashyan ham koronavirusga qarshi kurashga 1 million dollar xayriya qildi

Amerikalik model, aktrisa Kim Kardashyan koronavirus epidemiyasiga qarshi kurashga o‘z hissasini qo‘shishga qaror qildi. 39 yoshli yulduzga qarashli SKIMS kiyim brendi koronavirus tufayli murakkab vaziyatda qolganlar uchun 1 million dollar xayriya qildi, deb yozadi Cosmopolitan.

“Koronavirusdan zarar ko‘rgan oilalar, ona va bolalarni shunday murakkab davrda qo‘llab-quvvatlash uchun SKIMS tomonidan million dollar ajratilishini faxr bilan ma’lum qilaman”, — deb yozgan Kim.

SKIMS 30-martdan yangi kolleksiyani sotuvga chiqaradi. Kanye Uestning turmush o‘rtog‘i hisoblangan Kim savdolardan olingan daromad foizlarini ham nochorlarga yordam sifatida sarflashni rejalashtirmoqda.

Avvalroq Kim Kardashyanning o‘gay singlisi Kayli Jenner ham koronavirus pandemiyasi bilan kurashayotgan tibbiyot xodimlariga himoya kiyimlari va niqoblar sotib olish uchun bir million dollar ajratgandi.

Ta’kidlash joiz, COVID-19 bilan kasallanganlar soni bo‘yicha ayni vaqtda AQSh yetakchilik qilmoqda. Butun dunyoda virus bilan kasallanganlar 800 mingga yaqinlashib qolgan bo‘lsa, shundan 160 mingdan ortig‘i Amerikaga to‘g‘ri keladi.