Futbol dunyosi koronavirus pandemiyasiga qarshi kurashda o‘z yordamini ayayotgani yo‘q: niqoblar sotib olishdan tortib, virusga qarshi kurash uchun pul mablag‘lari yig‘ishga qadar. Quyida shulardan bir nechtasini namuna sifatida taqdim etamiz. Katta ehtimol bunday vaqtda qilinayotgan xayrli ishlar miqdori o‘ylaganimizdan ham ko‘p. Biroq biz ular haqida biroz vaqt o‘tib bilarmiz, balki umuman ular haqida bila olmasligimiz ham mumkin.

Foto: Getty Images

— Italiyaning sobiq bosh vaziri va “Milan” klubi sobiq egasi Silvio Berluskoni Lombardiya shahrida koronavirusga qarshi kurash uchun 10 million yevro xayriya qildi. Qayd etish joiz, Italiyaning ushbu hududida virus bilan zararlanganlar soni boshqa hududdagilarga nisbatan ancha ko‘p. Ushbu mablag‘ga 400 bemorni doimiy parvarish qilish imkoniyatiga ega shifoxona qurilishi boshlab yuborildi.

— “Yuventus”ga egalik qiladigan Anyelli oyilasi Lombardiyaga qo‘shni Pyemont shahriga Berluskoni kabi 10 million yevro taqdim etdi. Bundan tashqari Turin klubi sog‘liqni saqlash mahalliy departamentiga 500 ming yevro miqdorida pul yig‘ib berdi. Ushbu mablag‘ga shifokorlar uchun arzon bo‘lmagan 150 ta respirator sotib olinadi.

Foto: Getty Images

— Donetskning “Shaxtyor” klubi xo‘jayini Rinat Axmetov koronavirus bilan qarshi kurashga 10 million yevro atrofida mablag‘ ajratdi. Ushbu pullarga koronavirusni aniqlaydigan 20 mingdan ortiq ekspress-testlar, tahlil apparatlari, shaxsiy himoya vositalari va yengil sun’iy ventilyatsiya dastgohlari xarid qilinadi. Bundan tashqari Axmetov yana 300 mingta test hamda 200 ta ventilyatsiya apparatlari sotib olib berishni va’da qilgan.

“Koronavirus — insoniyat birinchi bor katta ko‘lamda duch kelgan og‘ir musibat. Bunday holatda har bir ukrainalik mamlakatimizga aniq qanday yordam ko‘rsata olishi haqida o‘ylab ko‘rishiga ishonaman. Biz chetda turmaymiz — yordam berganmiz, beryapmiz va bunda davom etamiz. Faqatgina kuchlarimizni birlashtirgan holda Ukraina oldida turgan barcha qiyinchiliklarni yenga olishimiz mumkin”, — deydi Axmetov.

Foto: Getty Images

— “Bavariya” hamda Polsha terma jamoasi hujumchisi Robert Levandovski ham ko‘ngilli ravishda rafiqasi Anna bilan birgalikda koronavirusga qarshi kurash uchun xayriya jamg‘armasiga 1 million yevro xayriya qildi.

“Hammamiz qiyin vaziyatda qoldik. Hozir barchamiz bitta jamoada o‘ynayapmiz. Kelinglar, ushbu jangda kuchliroq bo‘lamiz. Agar kimgadir yordam berish qo‘limizdan kelsa, keling buni amalga oshiramiz. Hammasi tez orada o‘z o‘rniga tushishiga ishonamiz”, — deyiladi Levandovskilar bayonotida.

— Levandovskilar qatorida uning klubdoshlari Yozua Kimmix hamda Leon Goretska ham 1 million yevro miqdoridagi mablag‘ni koronavirus bilan kurashga yo‘naltirdi. Ular We Kick Corona platformasini ishga tushirdi. Unga har bir xohlovchi qo‘shilishi mumkin. Xayriya qilish yoki yordam so‘rash imkoniyati yaratildi. “Salomatlik — biz uchun hamma narsa. Hozir esa qanday bo‘lmasin, xoh kichik yoki katta birdamlik zarur. Hamma yordam berishi mumkin”, — deya ta’kidladi Kimmix.

Yozua va Leonning g‘oyasini Mats Hummels, Leroy Sane, Benedikt Hevyedes kabi futbolchilar qo‘llab-quvvatladi. Ular hozirga qadar 2,5 million yevrodan ortiq mablag‘ yig‘ishga erishdi. Bundan tashqari Germaniya terma jamoasi futbolchilari va murabbiylari birgalikda virusga qarshi kurash uchun 2,5 million yevro taqdim etadi.

Foto: Getty Images

— “Inter” sobiq xo‘jayini Massimo Moratti Lombardiya sog‘liqni saqlash vazirligiga 1 million yevro ajratdi.

— Zlatan Ibragimovich Kick the Coronavirus away tashviqot kampaniyasini boshladi. U 100 ming yevro ajratdi. 2 kunda esa kampaniya orqali 300 ming yevro yig‘ishga erishdi.

Foto: Getty Images

— “Keling birgalikda bu virusni uloqtirib tashlaymiz va bu o‘yinda g‘alaba qozonamiz. Agar virus Zlatanga kelmasa, Zlatan virus yoniga boradi”, — deya chiqish qildi Zlatan Ibragimovich.

— Xayriya qilgan futbolchilar ro‘yxati ham boyib bormoqda. Ular qatorida Lorenso Insinye (100 ming yevro), Sadio Mane (40 ming funt), Kasper Shmeyxel (20 ming funt) kabi futbolchilarni ko‘rish mumkin.

— SPAL hujumchisi Andrea Petanya virusga qarshi kurash uchun 30 ming yevro xayriya qildi. Shuningdek, yana 170 ming yevro yig‘ilishida bosh-qosh bo‘ldi. Yig‘ilgan mablag‘lar Milandagi shifoxonalardan biriga taqdim etilgan. “Torino” hujumchisi Simone Zaza 10 ming yevro xayriya qilib yana 50 ming yevro yig‘ilishiga yordam berdi. Hozirda mablag‘ yig‘ish ishlarini faol davom ettirmoqda. “Yuventus” vakli Federiko Bernardeski 50 ming yevro o‘z yonidan virusga qarshi kurash uchun ajratdi. U ham Zaza singari pul yig‘ish ishlarida qatnashmoqda. Bunday misollarni ko‘plab keltirish mumkin.

— “Atalanta” muxlislari tashabbus orqali chiqib, 40 ming yevro yig‘di va pullarni Bergamodagi shifoxonalardan biriga taqdim qildi. Bergamo Lombardiyadagi koronavirusdan eng ko‘p zararlangan hududlardan biri bo‘lib turibdi.

— Klublar ham chetda turgani yo‘q. “Inter” kraundfanding orqali Milandagi Luiji Sako nomidagi shifoxona uchun #TogetherAsATeam shiori ostida mablag‘ yig‘ishni boshlab yuborgan. Futbolchilar 500 ming yevro yig‘ib berdi. Muxlislar esa 100 ming yevrodan ko‘proq mablag‘ yig‘ib berdi. Ushbu mablag‘lar hisobidan mahalliy sog‘liqni saqlash tashkiloti uchun 300 ming dona niqob xarid qilindi.

— “Roma”, “Fiorentina”, “Milan”, “Yuventus” klublari kraudfanding orqali har biri 400—500 ming yevrodan mablag‘ yig‘ishga erishdi. Rimliklar bundan tashqari jamoa bilan 200 ming yevro yig‘ib, 8 ming juft tibbiyot qo‘lqoplari, 2 ming shisha antiseptik vositalari, 5 ta yengil sun’iy ventilyatsiya apparatlari va doimiy parvarish uchun bir nechta osma karavotlar sotib oldi.

— Angliyada chempionat o‘yinlari oxirgilardan bo‘lib to‘xtatildi. Shunga qaramay APL klublari ham qarab turgani yo‘q. Masalan, “Chelsi” klub xo‘jayini Roman Abramovichning topshirig‘i bilan “Stemford Brij” yaqinidagi mehmonxonasini mamlakat sog‘liqni saqlash tizimi xodimlariga bepul foydalanish uchun taqdim etdi.

— “Manchester Siti” va “Manchester Yunayted” birgalikda #ACityUnited heshtegi ostida 100 ming funt yig‘di va muxlislarni ham bu xayrli ishga qo‘shilishga chorladi.

— “Sporting” xo‘jayini Frederiku Varandash qiyin vaziyatda vatani oldidagi burchini uzish uchun asosiy kasbi — shifokorlikka qaytdi.

Foto: Getty Images

— Taniqli agent Jorje Mendesh 200 mingta tibbiyot xalati, Portudagi shifoxona uchun 3 ta yengil sun‘iy ventilyatsiya apparatlarini sotib oldi. Uning asosiy mijozi Krishtianu Ronaldu esa ona vatanidagi gospitallardan biriga 40 mingta maska sotib olib berdi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!