O‘zbekistonda koronavirus infeksiyasini yuqtirib olganlar soni 37 nafarga yetdi. Bu haqda Sog‘liqni saqlash vazirligi xabar bermoqda.
Vazirlar Mahkamasi huzuridagi Sanitariya-epidemiologiya nazorati davlat inspeksiyasi boshlig‘i Nurmat Otabekovning ma’lum qilishicha, yangi kasallanish holatlari karantinga olingan shaxslar orasida aniqlangan, ular Virusologiya institutida shifokorlar nazorati ostida, ahvoli yaxshi.
20-mart kuni O‘zbekistonda koronavirus infeksiyasiga chalinganlar soni 33 nafarga yetgan edi — kasallanganlar soni bir sutkada 10 kishiga ko‘paygandi. Sog‘liqni saqlash vazirligi ularning to‘qqiz nafari kasalligi avval aniqlangan shaxslarning qarindoshlari, yana biri esa yaqinda xorijdan kelgan fuqaro ekanini ma’lum qilgan, biroq aynan kimlarning qarindoshi ekaniga, xorijdan kelgan fuqaro aynan qayerdan, qachon, necha nafar yo‘lovchi bilan birga kelganiga aniqlik kiritmagan edi.
Dastlabki 23 bemor haqida
O‘zbekistonda koronavirusga chalinish bilan bog‘liq ilk holat 15-mart kuni qayd etildi — shu kuni 11-martda Fransiyadan qaytgan shifokorning tahlillari koronavirusga ijobi natija berdi. Keyinchalik (19-mart soat 23:59 holatiga ko‘ra) uning o‘g‘li, qizi, turmush o‘rtog‘i, nevarasi, onasi, kelini, yana to‘rt qarindoshi, shuningdek, bir hamkasbida ham kasallik chiqdi.Bundan tashqari, 19-mart soat 23:59 holatiga ko‘ra, 15-mart kuni tongda Istanbuldan Toshkentga kelib qo‘ngan HY274 reysining olti yo‘lovchisida (ular orasida ikki er-xotin ham bor), 14-mart kuni Londondan Toshkentga kelib qo‘ngan HY202 reysining to‘rt yo‘lovchisida, shuningdek, Dubaydan kelgan, biroq aynan qachon kelgani aytilmagan bir fuqaroda ham koronavirus aniqlangan edi.
Avvalroq mamlakatning bosh davlat sanitariya vrachi Bahrom Almatov O‘zbekistonda koronavirusga chalingan ilk bemorlar sog‘ayayotgani, koronavirusga chalingan bemorlarning 90 foizi birinchi va ikkinchi kasallangan bilan muloqotda bo‘lgan shaxslar ekanini ma’lum qilgan edi.
Tuzatish: Xabarning dastlabki tahririda to‘rt nafar yangi bemorning koronavirusni qanday yuqtirgani, qayerda davolanayotgani va joriy ahvoli haqida ma’lumot berilmagani haqida ta’kid bor edi. Bu xato — “O‘zbekiston 24” telekanalida bu haqda qisqa axborot berilgani ma’lum qilindi. Bu xatolik uchun mushtariylardan uzr so‘raymiz.
Izoh (0)