Xorazmning Yangiariq tumaniga yangi hokim tayinlandi. Yangibozor va Hazorasp hokimlari ham almashishi kutilmoqda

Muhammadmurod Xudoyberganov Xorazm viloyatining Yangiariq tumani hokimi etib tayinlandi. Bu haqda viloyat hokimligi matbuot xizmati xabar bermoqda.

U tuman hokimi lavozimida Maxsud Saidovni almashtirgan. Muhammadmurod Xudoyberganov ushbu tayinlovga qadar 2019-yildan buyon Agrosanoat kompleksini nazorat qilish inspeksiyasi viloyat boshqarmasi boshlig‘i lavozimida ishlab kelayotgan edi.

Qayd etish joiz, mazkur tayinlov Prezident Shavkat Mirziyoyevning Xorazm viloyatiga tashrifidan ko‘p o‘tmay amalga oshirildi. “Gazeta.uz”ning o‘z manbalariga asoslanib qo‘shimcha qilishicha, viloyatning Yangibozor va Hazorasp tumanlari hokimlari ham o‘zgarishi kutilmoqda.

Ayni vaqtda “Xabar.uz”ning yozishicha, Prezident tashrifidan so‘ng Xorazm hokimining qurilish bo‘yicha o‘rinbosari O.Kuryazov ishdan olinib, o‘rniga shu vaqtgacha Toshkentda ishlab kelgan B.Qurbonov tayinlangan. Shuningdek, viloyat hokimining qishloq xo‘jaligi masalalari bo‘yicha o‘rinbosari O‘.Qurbonov Yangibozor tumaniga hokim etib tayinlanishi kutilayotgani munosabati bilan, u lavozimidan ozod etilib, o‘rniga boshqa kadr tayinlangan.