14-fevral, juma kuni, TIV tomonidan OAV vakillari uchun matbuot anjumani tashkil etildi. Unda tashqi ishlar vazirining birinchi o‘rinbosari Ilhom Ne’matov jurnalistlarni qiziqtirgan savollarga javob qaytardi, deya xabar bermoqda “Daryo” muxbiri Mirolim Isajonov.
Ochiq muloqotda TIV rasmiysi Rishton—So‘x yo‘lining ochilganidan ikki kun o‘tgach yopib qo‘yilgani haqidagi savolga shunday javob berdi.
“Bunda hech qanday bir siyosiy ma’no va siyosiy omil yo‘q. Hamma narsa bir-biriga bog‘liq. Qirg‘iziston — Yevrosiyo iqtisodiy ittifoqiga (YeOII) a’zo davlat. Yevrosiyo iqtisodiy ittifoqi — iqtisodiy tashkilot. Bunda iqtisodiy rejim umuman boshqacha.
Shaxsan o‘zim So‘x yo‘li ochilishiga borganman. To‘g‘ri, So‘x yo‘li ochildi va ertasiga yopildi. Yopilganining sababi — biz YeOII tashkilotga a’zo emasmiz. Bizda savdo rejimi mutlaqo boshqacha. Qirg‘iziston bilan bugungi kunda 21 ta post bo‘ladigan bo‘lsa, 14 ta post ishlab turibdi. Lekin qolgan 7 tasi, masalan, So‘x ishlamayapti. Hozirgi kunda bu muammoni hal qilish uchun Qirg‘iziston tomoni bilan muzokaralar olib boryapmiz”, — dedi Ne’matov.
Mavzuga doir:
“Hozirgi kunda bizdan berilgan taklifni Qirg‘iziston tomoni ko‘rib chiqyapti. Bosqichma-bosqich hamma postlarni ochishga taklif berganmiz.
Tojikiston bilan 17 ta postni ochib qo‘ydik. O‘n sakkizinchi postni ochish bo‘yicha ish olib boryapmiz. Qirg‘iziston bilan ham xuddi shunday bo‘ladi. Lekin bunga ozgina vaqt kerak. Chunki Qirg‘iziston YeOII a’zo bo‘lganligi uchun ularda savdo rejimi sal boshqacharoq. Biz bunga sal moslashishimiz kerak. Sababi bojxona orqali import va eksport qilish, hujjatlarni rasmiylashtirish masalasi yotibdi. Ammo bu doimo kun tartibida turibdi. Biz buni oxiriga yetkazamiz”, — degan Ilhom Ne’matov.
Izoh (0)