Ijtimoiy tarmoqlarda Mirzo Ulug‘bek tumanidagi 451-maktabgacha ta’lim tashkiloti, shuningdek, 70, 76, 78, 9 va 105-uylar oldiga “qabristondan olib kelingan” deyilayotgan tuproq tashlanganiga oid foto va videoxabarlar tarqaldi. Toshkent shahar hokimligi ushbu holat yuzasidan izoh berdi.
Hokimlik matbuot xizmati jamoasi Mirzo Ulug‘bek tumanidagi “Elobod” mahallasi hududida bo‘lgan. Bu yerda mahalliy aholi orasida mashhur bo‘lgan, bevosita qabriston yaqinida qurilgan “Mulla Qosim” qabristoni joylashgan. Masjid kichik va eski bo‘lgani bois, uning o‘rnida 0,55 gektar maydonda yangi masjid qurilishi rejalashtirilgan.
“Qurilish ishlariga jalb etilgan texnika qabrlar ko‘milgan joylarda ishlamagan. Bundan tashqari, mahalliy oqsoqollar va qabriston ishchisining so‘zlariga ko‘ra, qabrlar oldidagi barcha ishlar ushbu mozorda dafn etilganlarning qarindoshlari guvohligida amalga oshirilgan”, — deyiladi Toshkent shahar hokimligi axborotida.
Mahalla oqsoqoli va qabristoni ishchisi ijtimoiy tarmoqlarda shov-shuv bo‘lgan hodisaga munosabat bildirarkan, bevosita masjid hududida hech qanday qabrlar bo‘lmaganini va bu yerdan olib chiqib ketilgan tuproqda inson qoldiqlari bo‘lishi mumkin emasligini ta’kidlagan.
451-maktabgacha ta’lim tashkiloti oldida qoldirilgan tuproq uyumi ichidan suyaklar chiqqani bilan bog‘liq holat ham o‘rganilgan. Mahalla raisining ta’kidlashicha, bog‘cha oldida qoldirilgan tuproqning sobiq masjiddan olib chiqilgan tuproqqa aloqasi yo‘q. U yaqin atrofdagi kotlovan qazilgan boshqa qurilish maydonidan olib kelingan.
“Tuproq uyumlarini tanlama qazish vaqtida suyaklar topilmadi. Tuproq uyumini ekskavator vositasida tekislash vaqtida ham suyaklar chiqqani yo‘q”, — deyiladi Toshkent shahar hokimligi axborotida.
Izoh (0)