Namangan viloyat IIBda viloyat ichki ishlar organlarining 2019-yil yakuni bo‘yicha tezkor xizmat faoliyati natijalari hamda kelgusida amalga oshirilishi lozim bo‘lgan vazifalar muhokamasiga bag‘ishlangan yig‘ilish bo‘lib o‘tdi. Bu haqda IIB axborot xizmati xabar bermoqda.
Tadbirda Ichki ishlar vazirining o‘rinbosari, polkovnik Ayubxon Rahmatullayev hamda boshqarma boshlig‘ining o‘rinbosarlari, mustaqil boshqarmalar, sohaviy xizmatlar rahbarlari, shahar-tumanlardagi barcha ichki ishlar bo‘limlari boshliqlari va boshqa sohaviy xodimlar ishtirok etdi.
Namangan viloyat IIB boshlig‘i Odil Otaxo‘jayev 2019-yil davomida viloyat hududida jinoyatchilikka qarshi kurashish, huquqbuzarliklarni barvaqt oldini olish, xavfsizlikni ta’minlash va jamoat tartibini saqlash borasida ichki ishlar organlari tomonidan qator ijobiy ishlar amalga oshirilgani, shu bilan birga, ayrim kamchiliklarga ham yo‘l qo‘yilganligini ta’kidlab o‘tdi.
Viloyatda umumiy jinoyatlar sonini kamaytirishda Prezident tashabbusi bilan yaratilgan yangicha tizim — hokimlik, prokuratura, Milliy gvardiya va jamoatchilik tuzilmalari bilan hamkorlikda amalga oshirilgan profilaktik tadbirlar samarasi o‘laroq yil yakuniga kelib viloyatdagi 775 ta mahallaning 198 tasida jinoyat sodir etilishiga yo‘l qo‘yilmaganligi e’tirof etildi.
Shu bilan birga, yilning ikkinchi yarmida tezkor xizmat faoliyat susaygani va profilaktik tadbirlar yetarli o‘tkazilmagani oqibatida yil so‘ngida ayrim hududlarda turli og‘ir ko‘rinishdagi jinoyatlar soni oshgan.
Bu kabi mas’uliyatsizlikni oldini olish maqsadida qo‘l ostidagi xodimlar xizmatini to‘g‘ri tashkil eta olmaslik, tezkor-profilaktik tadbirlarni o‘z holiga tashlab qo‘yganlik va boshqa kamchiliklar kuzatilgan rahbar xodimlarni lavozimidan ozod qilish, shuningdek, xizmat vazifasiga mas’uliyatsiz yondashgan xodimlarga nisbatan hayfsan va boshqa tegishli intizomiy choralar ko‘rilishi ta’minlandi.
Jumladan, shu kabi kamchiliklarga yo‘l qo‘ygan Namangan shahar IIO FMB 1-sonli IIB boshlig‘i egallab turgan lavozimidan ozod qilindi.
Shu bilan birga, viloyat hududida namunali jamoat tartibini saqlash, fuqarolar xavfsizligini ta’minlash, huquqbuzarlik va jinoyatchilikni hamda qonun buzilishini oldini olishda xizmat vazifasiga vijdonan va sidqidildan yondashib, boshqalarga o‘rnak bo‘la olgan xodimlar munosib rag‘batlantirildi.
Ikki soatdan ko‘proq davom etgan yig‘ilish yakunida viloyat IIB boshlig‘i tomonidan kelgusida barcha vazifalar ijrosi qat’iy nazoratga olinib, belgilangan muddatlarda axborot berib borilishining tashkillashtirilishi yuzasidan tegishli ko‘rsatmalar berildi.
Izoh (0)