Qashqadaryo viloyatining Chiroqchi tumanida yashovchi 95 yoshni qarshilayotgan onaxon — Ruyab Bolliyeva biometrik pasport oldi. Bu haqda “Daryo”ga tuman hokimligi axborot xizmati rahbari Sobit Raimqulov ma’lum qilmoqda.
Xabarda aytilishicha, 1925-yil tug‘ilgan onaxon 15-dekabr, yakshanba kuni biometrik pasport olish niyatida tuman fuqarolikni rasmiylashtirish bo‘linmasiga borgan.
— Farzandlarim yangi pasport olib berish uchun olib kelishdi, — deydi 95 yoshli onaxon Ruyab Bolliyeva. — Hatto dam olish kuni bo‘lsa-da “pasport stol” xodimlari mening mushkulimni oson qilishdi. Men yangi pasport oldim.
— 2019-yil davomida tumanda 40 mingdan ortiq fuqaroga biometrik pasport berildi, — deydi bo‘linma boshlig‘i, mayor Mahmadiyor Jo‘rayev. — Shu kungacha 500 dan ortiq fuqaro xonadoniga borib xizmat ko‘rsatildi va fuqarolik pasporti yetkazib berildi.
Qashqadaryo IIB Migratsiya va fuqarolikni rasmiylashtirish boshqarmasi katta inspektori Fayoz Qurbonovning ma’lumot berishicha, viloyatda ayni kunga qadar 2 million 165 ming 515 nafar kishi biometrik pasport olgan. Bu — aholini biometrik pasport bilan ta’minlash 99,7 foizga yetganini ko‘rsatadi.
Aytilishicha, viloyatda fuqarolik pasportini almashtirishga ugurmagan 6813 nafar kishiga 2019-yil 20-dekabrga qadar yangi pasport berilishi rejalashtirilgan.
Eslatib o‘tamiz, ayni kunga qadar foydalanilib kelinayotgan nobiometrik pasportlar 2019-yil 31-dekabr kuniga qadar haqiqiy hisoblanadi.
Izoh (0)