Joriy yil 21-noyabr kuni Yakkasaroy tuman IIBga 22 yashar Johar L.dan noma’lum shaxslar Malibu avtomobili salonidan umumiy qiymati 11,2 million so‘m bo‘lgan shaxsiy buyumlari o‘g‘irlangani haqida murojaat kelib tushdi. Mazkur holat yuzasidan JKning 169-moddasi (“O‘g‘rilik”) bo‘yicha jinoiy ish qo‘zg‘atildi. Bu haqda IIBB matbuot xizmati xabar bermoqda.
22-noyabrga o‘tar kechasi, soat 3:30 atrofida Shayxontohur tuman ichki ishlar idoralariga 41 yoshli Laziz A. murojaat qildi va Epica avtomobilidan shaxsiy buyum hamda hujjatlari o‘g‘irlanganini bildirdi. Ushbu holat bo‘yicha ham yuqoridagi modda bilan jinoiy ish qo‘zg‘atildi.
Tezkor tadbirlar davomida jinoyat-qidiruv xodimlari tomonidan kuzatuv kameralari yozuvlari o‘rganildi va ikki o‘g‘irlik ham Cobalt mashinasida harakatlangan shaxslar tomonidan amalga oshirilgani aniqlandi. Ko‘rilgan choralar natijasida 23-noyabr kuni gumonlanuvchilar qo‘lga olindi.
Ular Andijon shahrida tug‘ilgan 24 yashar Mansur Mansurov, Afzal Lutfiyev va 22 yoshli Xurshidbek Shamshiddinov bo‘lib chiqdi. Hozirda ularning shunga o‘xshash boshqa jinoyatlarga daxldorligi tekshirilmoqda. Fuqarolardan mazkur shaxslarning qilmishlaridan jabrlangan bo‘lsalar ichki ishlar idoralariga murojaat etishlari so‘ralgan.
Izoh (0)