“Jipi bor ham shoirdan, she’rni qarzga so‘raydi”. Uysiz shoir Mirzo Karimga avallagi intervyudan so‘ng xonandalar amaliy yordam berdimi? (video)

“Orangizda onam bo‘lsaydi”, “Dadamga ichirmanglar”, “Yoshlik bizni tashlab ketadi”, “Jayra-jayra”, “Dadamning muxlislari”, “Malikam”, “Uyga quruq qaytmasin erkak” kabi yuzlab ommalashgan qo‘shiqlarning muallifi, shoir Mirzo Karim uysiz yashayotgani, oilasi va farzandlari bilan o‘n yillardan buyon ijara uylarda sarson bo‘lib yurgani haqida “Daryo” ga bergan intervyusida gapirib bergan edi.

Jurnalist Feruz Muhammad shoir Mirzo Karimning ijara uyida ikkinchi marotaba mehmon bo‘lib, san’atkorlar tomonidan shoirga qanday amaliy yordam bo‘lgani bilan qiziqdi.

Avvalgi interyudan keyin butun dunyodan muxlislarimiz telefon qilishdi desam adashmagan bo‘laman. Misol uchun AQSh, Hindiston, Tojikiston, Qirg‘iziston, Belarusiya, Moldaviya, Qozog‘iston, Rossiya va yana bir qancha davlatlardan telefon qilishdi. Hattoki ularning telefon raqamlarini ham bir-birlariga adashtirib yubordim.

Ochig‘ini aytsam, san’atkorlarning orasidan Ulug‘bek Rahmatullayev telefon qilib ‘Aka, mendan rozimisiz?’ dedi. Men albatta roziman, dedim. Oldingi intervyuda ham kimdan noroziman deganman. Qayta-qayta san’atkorlarning qarzi yo‘q ekanligini ta’kidlaganman. Ulug‘bek Rahmatullayev ‘Aka, hozir konsertlarimni o‘tkazib olay, Ozod akam bilan gaplashaman, qo‘ldan kelgancha yordam qilamiz, qarab turmaymiz, siz yolg‘iz emassiz’, dedi. Bundan juda ko‘nglim ko‘tarildi, juda xursand bo‘ldim.

Mevali daraxtga tosh otiladi degandek, Xurshid Rasulov bilan yelkama-yelka ko‘p ishlaganimiz uchun, birga ko‘p ijod qilganimiz uchun, ko‘p gap-so‘zlar Xurshid Rasulov tomonga ketib qoldi. San’atkorlarning mendan qarzi yo‘q. Yuzlab san’atkorlar bilan ishlaganman, qaysi birini gapirishni ham bilmayman. Qaysidir birlaridan yordam ham kutmayman. Avvalo Alloh yordam qilsin, o‘zimni ham qo‘lim tosh ostida emas.

Amaliy yordamlar bo‘lgani yo‘q, lekin har doimgidek yaxshi niyatlar bor. Endi bu amalga oshadimi yo‘qmi, bilmayman. Kimgadir qaratib gap gapirmaganman. Lekin kimdir o‘ziga buni qaratib oladi, u o‘zini ko‘ngliga havola, hamma o‘zicha haq. Kimdir meni loqaydlikda aybladi, ‘erkak kishi o‘zing harakat qilsang bo‘lmaydi, uyning ahvolini qara deganlar’ ham bo‘ldi. Bu birovning uyida endi, bitta cho‘pni uyoqdan, buyoqqa olib qo‘yishimiz mumkin emas. Hammasi yaxshi, xalqimizning munosabati juda yaxshi.

Mirzo Karim, shoir