JCh—2022 ikkinchi saralash bosqichi 4-turi doirasida kechadigan Singapur — O‘zbekiston uchrashuvidan oldingi matbuot anjumanida O‘zbekiston terma jamoasi yordamchi murabbiyi Temur Kapadze va darvozabon Abdumavlon Abdujalilov ishtirok etdi.
— Oldingi murabbiy ketgach jamoa o‘yinida nimalar o‘zgardi?
— Singapur davlatiga mehmondo‘stlik uchun rahmat aytamiz. Savolga keladigan bo‘lsak futbolchilar hujumkor o‘ynashni istagandi, murabbiy o‘zgarganidan keyin ancha hujumkor taktikada o‘ynay boshladik. Biz ayni paytda o‘zbekistonlik muxlislar va mutaxassislar xohlagan o‘yinni namoyish etayapmiz.
— Singapur terma jamoasi haqida nima deya olasiz?
— Biz barcha raqibni hurmat qilamiz. Singapur ham shular qatorida. Bo‘lajak raqibimiz so‘nggi paytlarda yaxshi natijalar qayd etmoqda. O‘z o‘yinimizni ko‘rsatishga ya’ni hujumkor tarzda o‘ynashga intilamiz. Singapur safida hujumda tezkor futbolchilar bor, bundan tashqari aqlli murabbiyga ega.
— Ertaga O‘zbekiston butun o‘yin davomida tashabbusga egalik qilib, hujumda o‘ynaydimi?
— Zamonaviy futbolda butun o‘yin davomida hujumda o‘ynab bo‘lmaydi, ammo imkon qadar ko‘proq hujumda harakat qilishga intilamiz, — deydi Kapadze.
— Avvalgi murabbiy va hozirgi murabbiy o‘yin uslubida qanday farq bor?
— Biz ancha erkin o‘ynashni boshladik. Kuper vaqtida men terma jamoaga chaqirilmaganman. Abramov bilan “Bunyodkor”da ham birga ishlayman. Uni yaxshi bilaman va ko‘proq urg‘uni hujumga qaratishni boshladik, — deydi Abdujalilov.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)