2019-yilning birinchi yarim yilligida O‘zbekistonda ish bilan band aholining norasmiy sektordagi ulushi 1,1 foizga pasayib, jami mehnat resurslarining 58,2 foizini tashkil etdi. Bu haqda Yevropa va Markaziy Osiyo davlatlari iqtisodining 2019-yil kuzidagi holati bo‘yicha Jahon banki tomonidan e’lon qilgan hisobotda ma’lum qilingan.

Foto: Sputnik

Mazkur holat, ya’ni norasmiy sektorda ishlayotganlar sonining kamayishi O‘zbekiston tarixida birinchi marta ro‘y bermoqda.

Hisobotda qayd etilishicha, joriy yilning birinchi yarmida O‘zbekiston iqtisodiyotida kuzatilgan o‘sish, asosan, infratuzilma va sanoatga kiritilgan investitsiyalar hajmining o‘sishi bilan bog‘liq.

“Asosiy savdo hamkorlarining iqtisodiy holati bo‘yicha prognozlar unchalik ham ijobiy bo‘lmasa-da, O‘zbekiston iqtisodining o‘rta muddatdagi istiqboli yuzasidan taxminlar ijobiyligicha qolyapti va bu keng ko‘lamli islohotlarning davom etayotgani bilan izohlanadi”, — deyiladi Jahon banki hisobotida.

Ta’kidlanishicha, iqtisodiy o‘sish natijasida mamlakatdagi rasman tan olingan qashshoqlik darajasining biroz pasayishi kuzatilgan. Jumladan, 2017-yilda O‘zbekistonning 11,9 foiz aholisi qashshoq sanalgan bo‘lsa, 2018-yilga kelib bu ko‘rsatkich 11,4 foizga tushgan. Shunday bo‘lsa-da, hukumat keltirgan bu rasmiy statistik ma’lumotlar nostandart metodlar bilan hisoblab chiqilgan.

Prognozlarga kelganda, Jahon banki O‘zbekiston YIM 2019—2020-yillarda 5,6 foiz atrofida o‘sishini, 2021-yilga borib esa o‘sish sur’ati 6 foizga yetishini taxmin qilgan.

“O‘zbekiston iqtisodiyoti uchun asosiy xavf – global iqtisodiy holatning beqarorlashuvi ehtimolidir. Boisi mamlakatning, ayniqsa, asosiy savdo hamkorlari tashqi risklar qarshisida turibdi.

Ichki risk omillaridan esa kreditlash sur’atining yuqoriligi bu monetar siyosatning samaradorligini pasaytirib, moliya sektorining barqarorligiga salbiy ta’sir qilishini keltirish mumkin. Qolaversa, davlat qaramog‘idagi korxonalar, bank sektori, qishloq xo‘jaligi va yerga egalik sohasidagi islohotlarning keyingi bosqichini ham ehtimoliy ichki risklar qatoriga kiritish mumkin”, — deyiladi hisobotda.