Olmaota tog‘larida bir guruh alpinistlar pastga tushish imkonisiz qolib ketdi. Ulardan biri vafot etgan

Bir guruh alpinistlar Olmaota tog‘idan pastga tushish imkonisiz qolib ketdi, deb xabar beradi “Zakon.kz”.

Murat Otepbayev, Aleksandr Chechulin va Andrey Korneyev “Yovvoyi” dovoni orqali G‘alaba traversiga ko‘tarilgan. Balandlikda Chechulin kasal bo‘lib qolgan — o‘pkasi shamollagan bo‘lishi mumkin. Guruh palatkaning ustunlarini yo‘qotib qo‘ygani sabab qor orasida uxlashga majbur bo‘lgan. 16-avgust ertasida Aleksandr Chechulin qayta uyg‘onmagan.

Murat Otepbayevning qizi Aygul zudlik bilan yordam so‘ramoqda.

“6-darajali toqqa ko‘tarila olish huquqiga ega professional alpinistlar kerak. Marshrut murakkab, lekin umid bor. Abalakov marshruti. Ayni vaqtda muzlikda bunday alpinistlar yo‘q. 9:30—10:00 da uchiladi. Shuningdek, Qirg‘izistonning eng tajribali alpinistlariga murojaat qilaman!”, — deb yozadi Aygul.

Taxminlarga ko‘ra, alpinistlar guruhi 6600 metr balandlikda, pastga tushish imkonisiz qolib ketgan.

“Tabiiy sharoit va kerakli asbob-anjomlar yo‘qligi guruhning lagerga tushishiga imkon bermagan. Tirik qolgan Murat Otepbayev va Andrey Korneyev hech kim bilan bog‘lana olmaydi. Qirg‘iziston FVV qutqaruv guruhi Mi-8 vertolyotida o‘sha hududdan uchib o‘tdi. Ayni vaqtda ob-havo sabab qidiruv ishlarini to‘xtatishmoqchi. Murat Otepbayev 13 yillik tajribaga ega alpinist, Alpine Asia Team’da murabbiy, 4 nafar bolaning otasi. Alpinistlarning so‘zlariga ko‘ra, bu kabi ob-havo sharoitida toqqa professional alpinistlardan iborat qutqaruv-qidiruv guruhini yuborish mumkin”, — deya ma’lum qiladi Aygul.

Uning so‘zlariga ko‘ra, fuqarolik vertolyotlari 6600 metr balandlikda bu kabi yukni ko‘tara olmaydi.