Qarshi tumanidagi bog‘cha va maktablarga majburiy tartibda bilet sotilmoqda

Qarshi tumanidagi maktab va bog‘chalarga 15-avgust kuni bo‘lib o‘tadigan tumanning mustaqillik bayramiga majburiy tartibda bilet sotilmoqda. Bu haqda “Daryo” muxbiriga ismi ochiqlansa ishdan bo‘shatilishidan qo‘rqqan murojaatchi ma’lum qildi.

Axborot manbaining xabar berishicha, mustaqillik bayrami uchun sotilayotgan bilet narxi 12 000 so‘m. Ammo ba’zi bog‘chalar uchun bilet 12 500 so‘mdan sotilgan.

Biletdan anglashilishicha, konsertda “Qalpoq” kulgi jamoasining chiqishi kutilmoqda. Qalpoq hajviy guruhi ijodiy uchrashuvi hamda kulgi kechasi ekanligi yozilgan biletdan ma’lum bo‘lishicha, konsert biletlari tashkilotchisi “Abduvohid Salomat” oilaviy korxonasi.

Majburiy tartibda bilet sotilayotganligini tasdiqlagan bog‘cha tarbiyachilaridan birining aytishicha, bu biletlar nafaqat bog‘chalarga, balki maktab o‘qituvchilariga ham tarqatilmoqda. Bilet tarqatayotgan tashkilotchilar bu tuman hokimligi topshirig‘i ekanligini uqtirgan.

“Qalpoq” kulgi jamoasining konserti va ijodiy uchrashuvi deb yozilgan biletlarda konsert bo‘ladigan kun va soati yozilmagan. Ammo bilet narxi 12 000 so‘m ekanligi ko‘rsatilgan.

— Mustaqillik bayramiga poytaxtdan kelgan san’atkorlar shular ekan, — deydi murojaatchi. – Shuning uchun majburiy tartibda pul yig‘ishmoqda. Tuman budjetida bitta konsertni o‘tkazishga yetadigan pul ham qolmadimi? Nega endi ha deb bog‘cha va maktablarga yopishishadi?

Tumandagi maktab o‘qituvchilariga ham majburiy tartibda bilet sotilayotganini tumandagi maktablarning birida ishlovchi direktor rad etdi. Direktorning aytishicha, maktablarda konsert uchun hech qanday bilet sotilmayapti. Maktab direktorlarining o‘zi ham tumanning mustaqillik bayrami 15-avgust kuni bo‘lishini bugun eshitgan.

Konsertga majburiy tartibda bilet sotilganligini tasdiqlagan yana bir suhbatdoshning aytishicha, bugun, 15-avgust kuni tumandagi barcha bog‘chalarda pul yig‘ish boshlangan.

— Bitta bilet narxi bir kishiga og‘irlik qilsa, birgalishib to‘laymiz deyishib bog‘chadagi barcha ishchilardan 3–4 ming so‘mdan pul yig‘ilyapti, — deydi suhbatdosh.

Ismi ochiqlanishini istamagan bog‘cha mas’ullarining aytishicha, bog‘chalar uchun biletni tuman maktabgacha ta’lim bo‘limidan Nigora ismli xodim pullayapti.