Savdo-sanoat palatasida 18-aprel kuni o‘tkazilgan matbuot anjumanida “Tashabbus-2019” ko‘rik-tanlovi aprel-iyun oylarida bo‘lib o‘tishi ma’lum qilindi. Bu haqda “Daryo” muxbiri xabar berdi.
Ko‘rik-tanlovda hududlarni ijtimoiy-iqtisodiy rivojlantirishga o‘zining munosib hissasini qo‘shayotgan, tadbirkorlar, fermerlar va hunarmandlar, jumladan yosh tadbirkorlar ishtirok etishi belgilangan.
Tanlovning tuman (shahar) bosqichi 22-apreldan 15-mayga qadar, Qoraqalpog‘iston Respublikasi, viloyatlar va Toshkent shahar bosqichi 20-maydan 12-iyunga qadar o‘tkazish rejalashtirilgan.
Respublika bosqichi 20—21-iyun kunlari: “O‘zekspomarkaz” milliy ko‘rgazmalar majmuasida ko‘rik-tanlovning ochilish marosimi va ko‘rgazmasi, g‘oliblarini taqdirlash marosimi bo‘lib o‘tadi.
Ko‘rik-tanlov quyidagi asosiy nominatsiyalar bo‘yicha o‘tkaziladi va tanlov respublika bosqichi mutlaq g‘oliblari Prezident sovrini Chevrolet, Spark avtomashinalari bilan taqdirlanadi:
“Sanoat sohasida yilning eng yaxshi tadbirkori”;
“Xizmat ko‘rsatish sohasida yilning eng yaxshi tadbirkori”;
“Yilning eng yaxshi yosh tadbirkori”;
“Yilning eng yaxshi fermeri;
“Yilning eng yaxshi hunarmandi”.
Har bir boschqichda ko‘rik-tanlovning asosiy yo‘nalishlar bo‘yicha 1, 2, 3-o‘rin g‘oliblari aniqlanadi.
Shuningdek, tanlov ishtirokchilari 11 ta qo‘shimcha nominatsiya bo‘yicha mukofotlanadi.