Toshkentdagi “Damariq” kanalida cho‘kayotgan ona va uning 3 farzandi qutqarib olindi
10-aprel kuni Toshkent shahar Olmazor tumani hududida joylashgan “Damariq” kanalida suvga cho‘kayotgan ona va uning uch nafar voyaga yetmagan qizlari Milliy gvardiya xodimi kichik serjant N. Norqobilov tomonidan qutqarib qolindi. Bu haqda Milliy gvardiya matbuot xizmati xabar berdi.
Joriy yilning 10-aprel kuni, soat 12:00 lar chamasi, 1982-yilda tug‘ilgan fuqaro D.A. uch nafar voyaga yetmagan qizlari bilan “Damariq” qanali atrofida aylanib yurganida, uning kichkina qizi, 2011-yilda tug‘ilgan Sh.Aning oyog‘i sirg‘anib, kanalga tushib ketgan. Uni qutqarish maqsadida 2004-yilda tug‘ilgan opasi D.A o‘zini suvga tashlagan, biroq yordam berolmagan.
Ikkinchi qizi ham cho‘kishni boshlaganini ko‘rgan fuqaro D.A(qizlarning onasi) o‘zini suvga otgan. Bu holatni ko‘rib qo‘rqib ketgan 2009-yilda tug‘ilgan kenja qiz D.A ham suvga tushib olgan. 4 nafar inson birgalikda cho‘kib ketayotganida “Damariq” kanali bo‘ylab yashash manziliga ketayotgan Milliy gvardiya Toshkent shahar boshqarmasi xodimi kichik serjant N.E.Norqobilov ularni ko‘rib qolib, xizmat kiyimida o‘zini suvga tashlagan. Serjant ayol va qizlarini suv chetiga olib chiqqach, unga yordamga kelgan shu mahalla fuqarolari tez tibbiy yordam chaqirib, ona va uning 3 nafar qizini shifoxanaga olib borgan.
Mazkur holat yuzasidan Olmazor tumani Yoshlik mahallasi raisi X.T. Jambilov ma’lumot berishiga ko‘ra, hozirda fuqaro D.A va uning 3 nafar farzandining ahvoli qoniqarli. Tibbiyot birlashmasidagi shifokorlar tomonidan ularga ambulator tibbiy xizmat ko‘rsatilib, yashash manziliga ketishlari uchun ruxsat berilgan.
