Ayni paytda O‘zbekiston axborot va ommaviy kommunikatsiyalar agentligida “O‘qituvchilarning jamiyatdagi nufuzini oshirish bilan bog‘liq muammolar va ularning yechimlari” mavzusida matbuot anjumani bo‘lib o‘tmoqda. Bu haqda “Daryo” muxbiri Sevara Nishonova xabar berdi.
Matbuot anjumanida O‘zbekiston Respublikasi xalq ta’limi vaziri Sherzod Shermatov, vazirlik mas’ullari va OAV xodimlari ishtirok etmoqda.
Alohida ta’kidlash joizki, 2018-yilda O‘zbekiston Respublikasi Prezidenti Shavkat Mirziyoyev boshchiligida ta’lim tizimida keng ko‘lamli islohotlar amalga oshirila boshlandi. Bu islohotlarning asosiy yo‘nalishlaridan biri – jamiyatda o‘qituvchilar mavqeyini oshirishdan iborat bo‘ldi.
Xususan, 2018-yilning 14-avgust kuni O‘zbekiston Respublikasi Prezidentining “Yoshlarni ma’naviy-axloqiy va jismoniy barkamol etib tarbiyalash, ularga ta’lim-tarbiya berish tizimini sifat jihatidan yangi bosqichga ko‘tarish chora-tadbirlari to‘g‘risida”gi qarori qabul qilindi. Mazkur hujjat o‘qituvchilarning jamiyatdagi mavqeini oshirish bo‘yicha qator chora-tadbirlarni belgilab berdi. Ushbu qaror asosida mamlakat tarixida ilk bor o‘qituvchilarning maoshlari ikki bosqichda, ya’ni 2018-yilning 1-sentabrida va 2019-yilning 1-yanvarida oshirildi.
Bugunga kelib, o‘qituvchilar bazaviy tarif stavkalar asosida 1 509 255 so‘mdan 2 225 865 gacha oylik maoshi belgilandi. Bundan tashqari, pedagoglar daftar tekshirish va sinf rahbarligi uchun qo‘shimcha mablag‘ olmoqda. Bu esa 13 mingdan ortiq erkak o‘qituvchilarning maktabga qaytishiga sabab bo‘ldi.
“Davlatimiz rahbarining eng birinchi qarori ham o‘qituvchining maqomini oshirishga qaratilgan edi. Vaqti kelib, jamiyatda o‘qituvchining mavqei bundan ham yuksaladi. Prezidentimiz har bir videoselektorda o‘qituvchilar haqida albatta gapirib o‘tadilar, ‘Ularning oyligini 1000 dollarga chiqarmaguncha to‘xtamaymiz’, deb ko‘p aytadilar. Nasib qilsa, albatta, shu darajaga boramiz”, deydi Xalq ta’limi vaziri Sherzod Shermatov.
Izoh (0)