Samarqandda “Hindiston — Markaziy Osiyo” muloqotining birinchi sessiyasi boshlandi

Samarqand shahridagi Forumlar majmuasida “Hindiston – Markaziy Osiyo” muloqoti tashqi ishlar vazirlari uchrashuvining birinchi yalpi majlisi o‘z ishini boshladi. Bu haqda “Daryo” muxbiri Farhod Norbo‘tayev xabar bermoqda.

Uchrashuvda o‘zaro savdo hajmini oshirishga ko‘maklashish, transport va logistikani rivojlantirish, sanoat, energetika, axborot texnologiyalari, tibbiyot, farmatsevtika, qishloq xo‘jaligining muhim tarmoqlariga investitsiyalar, innovatsiya va texnologiyalar jalb qilish bo‘yicha hamkorlikning istiqbolli yo‘nalishlari, shuningdek, madaniyat, ilm-fan, ta’lim va turizm sohalarida hamkorlik masalalari muhokama qilinadi.

Majlisda Hindiston tashqi ishlar vaziri Sushma Svaraj, Qirg‘iziston tashqi ishlar vaziri Chingiz Aydarbekov, Qozog‘iston tashqi ishlar vaziri Beybut Atamqulov, Tojikiston tashqi ishlar vaziri Sirojiddin Muhriddin, Turkmaniston Vazirlar Mahkamasi Raisi o‘rinbosari, tashqi ishlar vaziri Rashid Meredov, O‘zbekiston tashqi ishlar vaziri Abdulaziz Komilov ishtirok etmoqda.

Tadbir avvalida O‘zbekiston tashqi ishlar vaziri Abdulaziz Komilov majlis ishtirokchilarini samimiy qutlab, Afg‘oniston ishtirokida birinchi marta yangi formatda o‘tkazilayotgan mazkur muloqot Markaziy Osiyo mamlakatlari va Hindiston o‘rtasidagi savdo-iqtisodiy, investitsiyaviy, madaniy-gumanitar aloqalar rivojiga kuchli turtki berishini ta’kidladi.

Vazirlarning birinchi uchrashuvi yakunlari bo‘yicha Qo‘shma bayonot qabul qilinishi ko‘zda tutilgan.