Toshkentdagi Alisher Navoiy nomli kinosaroyda rejissor Zulfiqor Musoqovning Ikkinchi jahon urushi haqida hikoya qiluvchi “Berlin — Oqqo‘rg‘on” filming yopiq taqdimoti bo‘lib o‘tdi, deb xabar berdi “Podrobno.uz”.
Ushbu kartina O‘zbekkino” Milliy agentligi, “O‘zbekfilm” DUK buyurtmasiga asosan suratga olingan.
Qayd etilishicha, mazkur filmda 1941-1945 yillarda kechgan Ikkinchi jahon urushida o‘zbek millatining jasur va mard o‘g‘lonlari, shuningdek, front ortidagi O‘zbekiston xalqining ko‘rsatgan beminnat mehnatlari hamda insoniylik munosabatlari aks ettirilgan.
Zulfiqor Musoqov ushbu film ustida yetti yil ishladi. Uning ssenariysi 2011-yilda yozilgan edi.
Film voqealari Moskva, Berlin va filmning bosh qahramonlaridan biri Qo‘zivoy tug‘ilib o‘sgan Oqqo‘rg‘on tumanida yuz beradi.
Kartinada bosh rollarni Hasan Shuhratov, Ra’no Shodiyeva, To‘ti Yusupova, Nigora Karimboyeva, Shahzoda Matchonova, Kristina Korubko va boshqalar ijro etgan.
Filmning ta’sirli epizodlaridan biri nemis ofitseri Klaus o‘zi sevgan yahudiy millatiga mansub Debora ismli ayol va uning oila a’zolarini shafqatsizlarcha otib tashlashidir. Deboraning ushbu fojiada tasodifan tirik qolgan nabirasi butun hayotini Klausni izlashga baxshida etadi. U Klausni topganida nemis ofitseri qarib qolgan va kasal edi. Deboraning nevarasi o‘zi sodir etgan jinoyatni Klausga eslatadi va uni otib tashlaydi.
Filmning katta premyerasi 20-dekabr kuni Alisher Navoiy nomli kinosaroyda bo‘lib o‘tadi.
Izoh (0)