Surxonteks korxonasining yillik ishlab chiqarish quvvati 9 ming tonnaga yetkazildi

Jarqo‘rg‘on tumanidagi Surxonteks qo‘shma korxonasi paxta tolasidan ip-kalava ishlab chiqarishga ixtisoslashgan. Uning ishlab chiqarish quvvatini yanada kengaytirish maqsadida joriy yilda bu yerda 9,5 mlrd. so‘mlik qurilish-ta’mirlash ishlari amalga oshirildi.

Tijorat banki tomonidan ajratilgan 9,6 million AQSh dollari miqdoridagi kredit mablag‘lari evaziga zarur zamonaviy ip-yigiruv dastgohlari bilan jihozlandi. Natijada korxonada yiliga 9 ming tonna ip-kalava, 4 ming pogon metr gazlama ishlab chiqarish yo‘lga qo‘yilgan.

Shu munosabat bilan o‘tkazilgan tadbirda qo‘shma korxonaning kengaytirilishi va ishlab chiqarish quvvatining oshirilishi haqida ma’lumot berildi.

Korxonada paxta xom-ashyosidan tayyor mato ishlab chiqarishgacha bo‘lgan jarayonlarda faol qatnashgan, fidoyilik ko‘rsatgan ishchi-xodimlarning ikki nafariga Damas va Spark avtomobili, bir guruhiga esdalik sovg‘alari topshirildi.

Modernizatsiyalash natijasida tashkil etilgan yangi sexlar hisobiga kengayib borayotgan Surxonteks faoliyati bilan tanishuv, uning tobora ortib borayotgan iqtisodiy daromad olish imkoniyatlari barchada katta taassurot qoldirdi.

Reklama huquqi asosida