O‘zbekistonlik talabalar Oksfordda o‘qish uchun Rods stipendiyasini qo‘lga kiritishi mumkin

Rods jamg‘armasi Buyuk Britaniyaning Oksford universitetida o‘qish uchun Rhodes Global Scholarship stipendiyasiga arizalar qabul qilmoqda, deb yozadi Spot. Arizalar 30-iyungacha qabul qilinadi.

Stipendiya magistratura, aspiranturada o‘qishni, ikkinchi oliy ma’lumot olishni moliyalashtiradi. Shuningdek, jamg‘arma stipendiatlarga yashash uchun muayyan summa ajratadi. 115 yillik tarixi davomida Rods stipendiyasi birinchi marta barcha mamlakatlar, shu jumladan, O‘zbekiston uchun ochildi.

Nomzodlar 1-oktabr holatiga ko‘ra 24 yoshdan oshmagan bo‘lishi va bakalavr darajasiga ega bo‘lishi kerak. Stipendiya misli ko‘rilmagan akademik qobiliyatlar va muvaffaqiyatlar hamda namoyon qilingan yetakchilik sifatlari uchun beriladi.

Stipendiya uchun nomzodlar arizalarni o‘zlari yubora olmaydi, ularning nomzodi o‘zlari o‘qigan universitet tomonidan ilgari surilishi kerak. Har bitta universitet uch nafargacha nomzodni taqdim eta oladi.

Universitetlardan nomzodlar 30-iyungacha, nomzodlardan arizalar 31-avgustgacha qabul qilinadi. Nomzodlar yil oxirigacha tanlab olinadi. Ilk stipendiatlar Oksfordga 2019-yilning oktabrida yetib keladi.

Stipendiya haqida batafsil ma’lumotni jamg‘armaning rasmiy saytidan olish mumkin.