O‘zbekiston BMTning qiynoqlarga qarshi konvensiyasi protokolini ratifikatsiya qilmoqchi
O‘zbekistonda BMTning qiynoqlarga hamda munosabat yoki jazoning boshqa shafqatsiz, g‘ayriinsoniy yoki qadr-qimmatni kamsituvchi turlariga qarshi konvensiyasi ixtiyoriy protokolini ratifikatsiya qilish imkoniyati ko‘rib chiqilmoqda. Bu haqda 18-aprel Toshkentda Xalqaro press-klub majlisi doirasida Bosh prokuratura boshqarmasi prokurori Aziz Eshbekov aytib o‘tdi, deb yozadi Sputnik.
Uning so‘zlariga ko‘ra, protokolni ratifikatsiya qilish masalasi idora darajasida muhokama qilingach, tez orada bu masala bo‘yicha qaror qabul qilinadi.
Bundan tashqari, shu yil qiynoqlar oldini olish bo‘yicha milliy preventiv mexanizm yaratiladi, u jazoni o‘tash, hibsda saqlash muassasalarida monitoring tashkil qilib, u yerda inson huquq va erkinliklari ta’minlanishini o‘rganishni ko‘zda tutadi.
