O‘zbekiston Bosh prokuraturasi sobiq bosh prokuror Rashid Qodirovning ishi bo‘yicha qo‘lga olingan shaxslarga nisbatan tergov harakatlari haqida axborot berdi. O‘z navbatida, bu ish bo‘yicha avvalroq OAVda tarqatilgan ba’zi xabarlarga raddiya berdi.

Toshkent viloyatining sobiq prokurorlari Jamshid Fayziyev va Ulug‘bek Sunnatov ushlangan

Bir necha kun avval internetda Toshkent viloyatining sobiq bosh prokurorlari — Jamshid Fayziyev va Ulug‘bek Sunnatov ushlangani, ular sobiq bosh prokuror Rashid Qodirov ishi bo‘yicha tergov qilinayotgani haqida xabarlar paydo bo‘lgandi. Bosh prokuratura bu xabarlarni tasdiqladi. Idora bayonotida bu haqda, jumladan, shunday deyiladi:

Tergov sirini oshkor etmagan va jinoyat protsessi ishtirokchilarining huquqlarini buzmagan holda, Bosh prokuratura tomonidan qo‘zg‘atilgan va tergov harakatlari o‘tkazilayotgan jinoyat ishi doirasida Rashid Qodirov Jinoyat-protsessual kodeksi 221-moddasi tartibida ushlanganligi haqida xabar berilgan edi. Hozirgi kunda jinoyat ishi bo‘yicha bosh prokurorning sobiq o‘rinbosarlari hamda Toshkent viloyatining sobiq prokurorlari Jamshid Fayziyev va Ulug‘bek Sunnatov ushlangan.

Bosh prokuraturaning qayd etishicha, qonunchilik talablariga muvofiq tergov organi dastlabki tergovni olib borish vaqtida jinoyat ishidagi barcha ma’lumotlarni yoki uning muayyan qismidagi ma’lumotlarni oshkor qilinmaydigan deb e’tirof etishga haqli.

“Bu kabi axborotlarni e’lon qilish tezkor tadbirlar va dastlabki tergovga ziyon yetkazishi, aybdor shaxslarni o‘z vaqtida fosh etish va ushlashga to‘sqinlik qilishi mumkin... Mazkur jinoyat ishi bo‘yicha tergov sirini tashkil qilmaydigan qo‘shimcha axborotlar vujudga kelishi barobarida Bosh prokuratura rasmiy saytida tegishli ma’lumotlar chop etib borilishi ma’lum qilinadi”, — deyiladi Bosh prokuratura axborotida.

Toshkent shahar prokurorining sobiq birinchi o‘rinbosari Mira’lam Mirzayev haqidagi xabarlar haqidagi xabarlar “haqiqatga muvofiq emas”

Avvalroq internet-nashrlarda Toshkent shahri prokurorining sobiq birinchi o‘rinbosari Mira’lam Mirzayev Rashid Qodirov ishi bo‘yicha ushlangani haqida xabarlar berilgan edi. Bosh prokuratura esa Mirzayev sobiq bosh prokuror ishi bo‘yicha ushlanmaganini ma’lum qildi. Idora raddiyasida shunday deyiladi:

Internet tarmog‘ida O‘zbekiston sobiq bosh prokurori Rashid Qodirovga nisbatan Bosh prokuratura tomonidan qo‘zg‘atilgan jinoyat ishi bo‘yicha Toshkent shahar prokurorining sobiq birinchi o‘rinbosari Mira’lam Mirzayev va uning oila a’zolari ushlanganligi to‘g‘risida xabar tarqatilgan. Bosh prokuratura ushbu ma’lumot haqiqatga muvofiq emasligini ma’lum qiladi.