Moskva davlat tibbiyot universiteti Ftiziatriya va pulmonologiya ilmiy-tekshirish instituti direktori, professor Dmitriy Giller boshchiligidagi mutaxassislar guruhi Namanganga keldi. Bu haqda “Daryo”ga jurnalist Sanjarbek Hamidov ma’lum qildi.
Viloyat sog‘liqni saqlash boshqarmasida uyushtirilgan anjuman sil kasalliklariga qarshi kurashning zamonaviy usul va uslublari haqida bo‘ldi. Dmitriy Giller xastalikning oldini olish va davolash tajribalari haqida so‘zlab berdi. Viloyat davolash-profilaktika muassasalarining bosh shifokorlari o‘zlarini qiziqtirgan savollarga mashhur olimdan to‘laqonli javoblar oldi.
Viloyat sil kasalliklariga qarshi kurash dispanserida davom etgan jarayonlar ham ko‘pchilikning yodida qoldi. Dastlab Dmitriy Giller ftiziatriya va pulmonologiya sohasi mutaxassislari ishtirokda sil kasalliklariga chalingan bemorlarni qabul qilib, ularni tibbiy tekshiruvlardan o‘tkazdi. Bemorlarni davolash yuzasidan tavsiyalarini berdi.
Keyinchalik “Mahorat darsi” amaliyot stolida davom etdi. Rossiyalik mashhur shifokor jarrohlik sohasidagi malakasini sil kasalligining og‘ir bosqichini boshidan kechirayotgan bemor o‘pkasini operatsiya qilishda namoyon etdi.
Izoh (0)