Bojxona qo‘mitasi tadbirkorlar bilan ochiq muloqot o‘tkazdi
16-sentabr, shanba kuni Toshkent shahar bojxona boshqarmasida tadbirkorlar bilan ochiq muloqot bo‘lib o‘tdi. Bu haqda Davlat bojxona qo‘mitasi axborot xizmati xabar bermoqda.
Ochiq muloqotda Toshkent shahar hokimligi, Adliya boshqarmasi, Savdo-sanoat palatasi Toshkent shahar boshqarmalari, Markaziy bank va Tashqi iqtisodiy faoliyat milliy banki, “O‘zbekiston temir yo‘llari” AJ Toshkent mintaqaviy temir yo‘l uzeli, O‘zbekiston avtomobil va daryo agentligi shahar boshqarmasi, “O‘zbekekspertiza” AJ, O‘zbekiston Respublikasi Tabiatni muhofaza qilish davlat qo‘mitasi, Toshkent shahar Davlat soliq boshqarmasining mas’ul xodimlari hamda ommaviy axborot vositalari vakillari ishtirok etdi.
“Davlat bojxona qo‘mitasi rahbariyati tomonidan kichik biznes va xususiy tadbirkorlikni ishonchli himoya qilishni ta’minlash maqsadida Respublika bo‘ylab sayyor qabul va uchrashuvlar tashkil etilmoqda. Bu o‘z navbatida tadbirkorlik subyektlari faoliyati davomida yuzaga kelayotgan muammo, taklif hamda savollar yuzasidan bevosita murojaat qilish imkonini beradi”, — deyiladi xabarda.
