O‘zbekiston bosh prokurori Belarusda bo‘lib qaytdi

O‘zbekiston bosh prokurori Ixtiyor Abdullayev 9—11-iyul kunlari Belarusda bo‘lib qaytdi. Bu haqda UZ24 xabar bermoqda.

Tashrif davomida O‘zbekiston bosh prokurori Belarus bosh vaziri o‘rinbosari Mixail Rusiy bilan uchrashgan, shuningdek, mamlakat Bosh prokuraturasi, Oliy sudi, Tergov qo‘mitasi va Adliya vazirligida muzokaralar o‘tkazgan.

Belarus bosh prokurori Aleksandr Konyuk bilan uchrashuv chog‘ida tomonlar hamkorlikdagi prokurorlik faoliyatini tashkil etish, huquqbuzarliklar profilaktikasi va jinoyatchilikka qarshi kurash muammolar bo‘yicha tadqiqotlar olib borish masalalarini muhokama qilgan.

Tergov qo‘mitasidagi uchrashuvda jinoyatlarni fosh etishda axborot-kommunikatsiya texnologiyalarini qo‘llash, biometrik va DNK ma’lumotlaridan foydalanish masalalari ko‘rib chiqildi.

“Tashrif samarali va har ikki tomon uchun foydali kechdi”, — deyiladi O‘zbekiston Bosh prokuraturasi axborotida.