Toshkentdagi Borovskiy nomidagi kollejning 2-kursida ta’lim oluvchi Jasurbek Ibrohimov 1-iyun kuni kasalxonada vafot etdi. U 3-may kuni kollejdoshlari tomonidan qattiq kaltaklangan, shundan so‘ng kasalxonaga tushgan edi. Shifokorlar jabrlanuvchini besh marta operatsiya qilgan, biroq uning hayotini saqlab qola olmagan. Marhumning onasi aybdorlarni jazolashni so‘rab, O‘zbekiston Prezidentiga murojaat qildi. Hodisa tafsilotlari hozircha faqat onaning so‘zlaridan ma’lum.
Jasurbek Ibrohimov 17 yoshda edi. Ijtimoiy tarmoqlarda uning onasi nomidan e’lon qilingan murojaatda ta’kidlanishicha, Jasurbek 1999-yil 11-dekabr kuni tug‘ilgan, Borovskiy kollejining 2-kursida ta’lim olardi. “U to‘liq ijobiy bola, yaxshi o‘qiydi, ichmaydi, chekmaydi, sport bilan faol shug‘ullanadi”, — deb yozadi ona. Ma’lumotlarga ko‘ra, oiladagi ahvol, ota-ona va bolaning o‘zaro munosabatlari yaxshi bo‘lgan. “Men va turmush o‘rtog‘im oliy ma’lumotli va barcha farzandlarimiz sog‘lom oilada, mehr va muhabbat og‘ushida voyaga yetmoqda”, — deb yozgan edi Jasurbekning onasi 29-may kuni ijtimoiy tarmoqlarda e’lon qilingan murojaatida. Murojaatda oiladagi farzandlari soniga aniqlik kiritilmagan.
Mavzuga doir: Kollejdoshlari tomonidan ayovsiz do‘pposlangan marhum Jasurbek Ibrohimovning onasi murojaati
Onaning ta’kidlashicha, Jasurbekni 2- va 3-kurslarda ta’lim oladigan kamida olti o‘quvchi do‘pposlagan, ulardan ikki nafari bezorilar ro‘yxatida ham turadi. “Mushtlashuv tafsilotini aytib berganlar O‘lmas orqadan kelib kuch bilan o‘g‘limni tepganini, so‘ng o‘g‘lim yiqilgani, qolganlar esa uni har tomondan tepkilashni boshlagani, oxirida esa O‘lmas yerda yotgan jabrlanuvchining ahvolini suratga tushirganini aytib berdi”, — deydi marhumning onasi. Jasurbek kasalxonaga yotqizilib, dastlabki ko‘riklardan so‘ng hushiga kelganidan so‘ng, onasiga “birinchi zarbadan so‘ng yiqilgani, so‘ng turishga uringan vaqtida, tizzalab turgani holda turli tomonidan tepkilangani, keyin hushidan ketgani”ni aytib bergan.
Kaltaklanganidan so‘ng, Jasurbek Ibrohimov bir oy ichida besh marta operatsiya qilingan. Yigit birinchi marta UTTdan o‘tkazilganida shifokorlar unga “buyrak va oshqozonosti bezi ishdan chiqishi” tashxisini qo‘ygan, miyasi chayqalgani va burun qismida sinish borligini aytgan. 5-may kuni Jasurbek birinchi marta operatsiya qilingan, operatsiyadan so‘ng shifokor Jasurda “o‘n ikki barmoqli ichak zararlangani, buyragini to‘la gematoma qoplab olgani, oshqozonosti bezi jiddiy lat yegani va boshqa organlari ham jarohatlangani, yiringlash boshlangani sabab qorin bo‘shlig‘i to‘qimasining bir qismi olib tashlangani”ni bildirgan.
Yigit shundan so‘ng 8-may, 19-may (shu kuni uning o‘t pufagi olib tashlangan), 20-may va 28-may kunlari operatsiya qilingan. Xabarlarga ko‘ra, yigitning “organizmi so‘nggi operatsiyani ko‘tara olmagan”.
O‘quvchilar o‘z kollejdoshini aynan qanday bahona bilan do‘pposlagani noma’lum. Borovskiyda avvalroq ham shunga o‘xshash voqea yuz bergan. Jasurbek Ibrohimovni do‘pposlaganlikda gumon qilinayotgan o‘quvchilar 2-kursda o‘qiydigan Temur ismli yigitni kaltaklab, unga jarohat yetkazgan (yigitning yuziga bir necha chok tushgan), so‘ng ishni “tinchitish uchun jabrlanuvchiga 200 dollardan pul berilgan”. “Kollej o‘quvchilarining aytishicha, Islom va O‘lmas nisbatan kuchsiz o‘quvchilarni uradi, buni suratga tushiradi, so‘ng ularning ota-onalari jabrlanuvchilarga pul to‘lab, ishni tinchitadi, bu o‘smirlar esa urib, jabrlanuvchini suratga tushirishdan va, albatta, jazoga tortilmasligidan zavq oladi”, — deb yozadi marhum Jasurbekning onasi.
Marhumning oila a’zolari 3-maydan beri Bosh prokuratura, IIV va hatto Ombudsmanga ham murojaat yo‘llagan. Oxir-oqibat, Jasurbekning onasi 3-iyun kuni internet orqali O‘zbekiston Prezidentiga murojaat qilishga majbur bo‘lgan. “Bevosita sizga ariza bilan murojaat qilish imkoniyati borligi uchun minnatdorchilik bildirib, boshqa organlarga, aynan — Bosh prokuratura, IIV, Ta’lim vazirligi, Sog‘liqni saqlash vazirligi, shuningdek, Ombudsmanga murojaat qilib, hech qanday natijaga erishmaganimizni ma’lum qilmoqchiman... O‘g‘lim vafot etdi! Ushbu vahshiyona tahqirlash uchun esa hech kim jazolanmayapti va bizni hamma inkor etmoqda!.. Bizning holatimizni his qilib ko‘ring — ardoqli o‘g‘ilsiz qolish dardi tasvirlab bo‘lmas darajada og‘ir, endi qandoq yashaylik?”.
Onaning ta’kidlashicha, gumonlanuvchilardan birining ota-onasi huquqshunos va “ular hammani sotib olib bo‘lgan”, shu sababli ham tegishli organlar ishni paysalga solmoqda, kollej o‘qituvchilari ham ishga panja ortidan qaramoqda (masalan, ona gumondagi o‘quvchilarning familiyalarini so‘raganida, o‘qituvchilar bu bolalarning familiyasini bilmasligini aytgan; hodisa yuz bergan vaqtda o‘quvchilar qayerda bo‘lgani haqida turlicha axborot bergan).
Hodisa ijtimoiy tarmoqlarni larzaga keltirdi. Jasurbek Ibrohimovning onasi tomonidan yozilgan murojaat Facebook’ning qariyb barcha katta pabliklarida e’lon qilindi. Birgina TROLL UZ sahifasida e’lon qilingan murojaat matniga to‘rt soat ichida 5,5 mingdan ortiq munosabat bildirildi, u 7 mingdan ziyod marta ulashildi, 2,5 mingga yaqin izoh yozib qoldirildi. Aynan ijtimoiy tarmoqlardagi faollik sabab OAV mazkur voqeaga e’tibor qaratdi.
Internet foydalanuvchilari marhumning oila a’zolariga sabr tilagan, rasmiylardan esa hodisaga e’tibor qaratib, aybdorlarni jazolashni qat’iy talab qilgan. “Change.org” servisida Jasurbekning o‘limi aybdorlarini jazolash talabi bilan petitsiya ochilgan (maqola yozilayotgan vaqtda uni 2,5 mingda ziyod foydalanuvchi imzolab, qo‘llab-quvvatlagan edi). Shu bilan birga, ijtimoiy tarmoq foydalanuvchilari Jasurbekning onasi tomonidan Prezidentga yo‘llangan murojaat ostida imzo to‘plash uchun 5-iyun kuni soat 12:00 da “Bobur” bog‘ida to‘planmoqchi.
Borovskiy kolleji hamshiralik ishi, davolash ishi, akusherlik ishi yo‘nalishlarida o‘rta maxsus tibbiy mutaxassislar tayyorlaydi. O‘quv yurtiga 1935-yilda asos solingan, 1976-yili unga medik-olim Pyotr Fokich Borovskiy nomi berilgan, 2004-yili esa kollej maqomini olgan. Kollejda, uning saytida keltirilgan ma’lumotlarga ko‘ra, 3 mingdan ziyod o‘quvchi ta’lim oladi. O‘quv muassasasiga 2008-yil noyabridan beri Lutfi Yusupova rahbarlik qiladi.
Kollejning o‘quvchilarining Odob-axloq qoidalari bor va unga ko‘ra “O‘quvchilarning o‘zaro munosabatlarida... hurmat,.. do‘stlik,.. va adolat tamoyillari amal qilishi lozim; O‘quvchilar munosabatlarida inson qadr-qimmatiga hurmatsizlik qilish, shaxsiyatini kamsitish, qo‘pollik, mushtlashish,... jismoniy ziyon yetkazish qat’iyan man etiladi”. Bu qoidalarni buzganlik uchun belgilangan jazolar haqida ma’lumot berilmagan.
Izoh (0)