“Vikipediya” 2016-yilda eng ko‘p o‘zgartirilgan maqolalar ro‘yxatini e’lon qildi

“Vikipediya” 2016-yilda eng ko‘p tuzatish va tahrir qilingan maqolalar ro‘yxatini e’lon qildi. Bu haqda TJournal xabar bermoqda.

Internet-resursga ko‘ra, joriy yilda olamdan o‘tgan bokschi Muhammad Ali, xonanda Devid Boui, astronavt Jon Glenn va boshqa mashhur insonlar haqidagi maqolalar eng ko‘p tahrir qilingan. “2016-yili o‘lganlar” toifasidagi materiallarga jami 18230 ta o‘zgarish kiritilgan.

Keyingi o‘rinlarni siyosiy voqealar bilan bog‘liq maqolalar egallagan. Jumladan, Donald Tramp haqidagi maqola 8933 marotaba tahrir etilgan. Shuningdek, “AQShdagi prezidentlik saylovlari”, “Hillari Klintonning prezidentlik kampaniyasini qo‘llab-quvvatlash” va “Respublikachilar partiyasi prezidentlik praymerizi” kabi materiallar ham eng ko‘p o‘zgartirilgan materiallar qatoridan o‘rin oldi.

Qiziq tomoni, mazkur ro‘yxatning 10-qatorini “2016-yilda Janubiy Koreya musiqasi” (5074 o‘zgarish) nomli maqola, 20-qatorini esa mashhur musavvir Vinsent Van Gog (3551 tuzatish) haqidagi material egalladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.