1 milliondan ortiq kishi Seul ko‘chalariga chiqib, Janubiy Koreya prezidenti Pak Kin Xening iste’fosini talab qildi, deb yozadi “RBK” “Ryonxap” agentligiga tayanib. Agentlik qayd etishicha, bu avval bo‘lib o‘tgan norozilik aksiyalari orasida eng ko‘p kishilisi bo‘lgan.
Aksiya tashkilotchilari ta’kidlashicha, noqulay ob-havoga qaramay, poytaxt markaziga 1,5 million kishi yig‘ilgan, butun mamlakat bo‘ylab esa namoyishchilar soni 1,9 millionni tashkil qilgan.
Ammo politsiya hisob-kitoblariga ko‘ra, Seuldagi norozilik aksiyasi ishtirokchilari 270 ming kishiga yetgan.
Prezident atrofidagi mojaro uning yaqin dugonasi Chxve Sun Sil ma’muriyatda hech qanday lavozimni egallamasdan turib, prezident nutqlarini tahrirlab bergani ma’lum bo‘lgach, yuzaga keldi. Chxve Sun Silni, shuningdek, o‘z ehtiyojlari uchun yaratilgan notijorat tashkilotiga xayriyalarni o‘tkazganlikda ayblashmoqda.
Pak Kin Xe kelib chiqqan mojarodan so‘ng omma oldida uzr so‘radi va o‘z prezidentligining dastlabki bosqichlarida nutq so‘zlash borasida ba’zan dugonasidan maslahat olganini e’tirof etdi. Ammo prezident iste’foga chiqishdan bosh tortdi.
Izoh (0)