Britaniyalik bokschi Ovill Makkenzi yuragidagi muammo sababli faoliyatini yakunladi
Britaniyalik bokschi Ovill Makkenzi yuragidagi muammo sababli faoliyatini yakunlashi haqida ma’lum qildi, deb xabar bermoqda “TASS”.
“Afsuski, tibbiy ko‘rik yuragimda jiddiy muammo borligini ko‘rsatdi. Shu sababli faoliyatimni yakunlashim kerak. Qo‘llab-quvvatlagan barchaga minnatdorchilik bildiraman”, – deb yozdi Makkenzi Twitter’dagi sahifasiga.
36 yoshli bokschi germaniyalik Marko Xuk bilan jang o‘tkazishi kerak edi. Ammo bellashuvga tayyorgarlik vaqtida Makkenzining yuragida muammolar paydo bo‘ldi va u chuqur tibbiy ko‘rikdan o‘tishga majbur bo‘ldi.
Ovill Makkenzi Buyuk Britaniyada mashhur bo‘lgan PrizeFighter turniri g‘olibi sanaladi. 36 yoshli bokschi professional ringda 38 jang o‘tkazib, 25 g‘alaba, 12 mag‘lubiyat va 1 durang qayd etgan.
